Shillong, Nailur 23: Ka seng JSU mynne ka sngi ka lah leit kynduh bad ki shipai BSF kiba ap pahara ha Amlarem lah bun sngi mynta bad kane ka jingdon ki BSF ha rud surok Amlarem ka lah buh dak jingkylli ia u paitbah bad na liang ka seng ka lah ioh ban ia kren bad u Commandant ka BSF Dawki bad u Sub Inspector ka BSF.
Kine heh shipai ki lah ong ba kane ka jingbuh iaka camp kadei shi bynta ka Joint Mobile Check post bad ki lah ong ruh kan dei tang ka camp kaba shipor ym ka shirta. Na ka liang u samla nongialam ka seng u samla Treibor R Suchen u lah ong iaki BSF kiba don hakane ka jaka bad ia u Commandant ka BSF Dawki ban ym bit ban pyndik iaka leit ka wan.
Katei ka jaka ba don ka ktem BSF dei ba ki paitbah nongshong shnong ka thaiñ ki iaid lynti bad ka dei ruh ka jaka tourist ioh ka ktah iaki nongwan jngoh kai pyrthei sha ka thaiñ bad u ne u samla u lah ong ba u heh BSF u lah ong sha ka seng ba kane ka jingbuh iaka camp kan dei kaba shipor.
Na ka liang ka seng ka lah dawa ruh na ki heh jong ka BSF ban peitngor iaka jingrung jingmih tuh ki dkhar Bangla sha India lyngba ki khap pud jong ka thaiñ War Jaintia baroh kawei namar ka jingbuh iaka camp shipai jong ki BSF ha Amlarem kan ym don jingmut lada ka rukom pahara sha khap pud ka long synjor kam myntoi iaki BSF kin wan buh jaka ap pahara shaduh sha Amlarem wad laka aiñ shah iaki ban ap.
