Shillong, Risaw 3: Wat la ka sorkar kam pat shim ia kano kano ka rai kumno ban leh ia ka jaka ba don ha Barik kaba don ki ophis jong ka PWD mynta, ki nongialam ka party UDP kaba dei kawei na kiba ia don lang ha kane ka sorkar Meghalaya Democratic Alliance (MDA) hapoh ka jingialam u General Secretary u Dr Jemino Mawthoh ban leit jurip ia kane jaka.
Ka jingleit jong ki nongialam ka party UDP, ki nongialam shnong bad ki riew shimet sha kane ka jaka ka long ban pynpaw ia ka jingpyrshah ia ka sorkar lada ka shna ia kita ki dukan kiba la tip kum ki shoping mall ha kane ka jaka bad ka jingpyrshah ka long ba kan pynkhap ngiah ia ka nongbah Shillong.
U Dr Jemino Mawthoh u general secretary jong ka UDP u la ong ba ia kane kim pat ia kren hapoh ka party UDP, hynrei bun na ki briew jong ka UDP kila pynpaw ia ka jingpyrshah ia kane ka jingthmu lada ka dei shisha ba ka sorkar kan shna ia ki dukan ha kane ka jaka, kane ka jingpyrshah kala mih na ki seng bhalang bad ki ba bun ki paidbah.
U Dr Mawthoh u la ong ba lada ia kren ia ka jingkhapngiah hapoh kane ka sor kane ka dei ka kabu ban pynkylluid ia kane ka nongbah Shillong, lada ka don la lat ka lynti ban pynitynnad shuh balei ym leh kumta, kane ka dei ka jaka pdeng bad kham pynitynnad ia ka nongbah Shillong bad kan suk ka leit ka wan.
U bah Bindo M Lanong u la ong ba lada ka sorkar kan pynkylla noh ia kane ka jaka ka dei ban don ki jaka shnongkai ban don ki dukan kiba rit ban buh ia ki jaidsoh kiba mih ha kane ka jylla, hynrei ban ong ban buh ia ki shoping mall ki pyrshah.
Haba ia dei bad kane ka jaka lah ban pynkynmaw ba u myntri rangbah ka jylla u Conrad K Sangma u la kren ba ka sorkar haduh mynta kam pat shim kano kano ka rai, lada ka pyndon kam ruh kan pyndon kam ha kata ka rukom ban don ka jingbit jingbianglang ha baroh ki bynta.
