Shillong, Jylliew 06: Ka KSU mynta ka sngi kala phah ia ka dorkhas sha u myntri rangbah ka jylla u Conrad K Sangma halor ki 20 tylli ki mat jingdawa kiba ka seng kala buh ba ka sorkar ka dei ban pyntrei kam.
Ka seng kala ong ba ka seng ka buh ia kine ki arphew tylli ki mat jingdawa, ban iada ia ka jaidbynriew, ban kyntiew ia ka ioh ka kot bad na ka bynta ka bha ka miat jong ka jylla baroh kawei.
Ka seng ka buh ia kine ki 20 tylli ki mat jingdawa namar ka shim ba kine ki long kiba don kam na ka bynta ka jingdon kam ha ka jylla ia kaba mynta, ka sorkar ka dei ban pyntrei kam noh ia ka Inner Line Permit bad ban pyntrei kam pura ia ka MRSSA.
Ka seng ka kren shai ba ym dei ban shah tih Uranium bad ym dei ban wanrah ia ka lynti rel katba ym pat don ia ki lat jingiada na ka jingwan ki bar jylla, dei ban pynbeit noh ia ka jingiakajia pud.
Dei ban wanrah ia ka jingpynkylla ia ka Meghalaya Identification, Registration (Safety & Security) of Migrant Workers Act, 2020, ban pynrung ia ka ktien khasi ha ka khyrngit kaba phra.
Ka jingkular kai na ka sorkar jylla ha kaba ia dei bnad ka jingthung kam ha NEIGRIHMS, dei ban wanrah ia ka Land Ceiling Act in Meghalaya, ban buh ia ki jaka ai jingsumar ia kiba ngot ha u drok.
Ka sorkar ka dei ban pynbha ia ki jaka ai jingsumar, ka rep ka riang, wanrah ia ka jingkylla ha ka tnad pule, kyntiew ia ka kam shangkai pyrthei. Ban pynbha ia ka polisi ha ki kam ialehkai, wanrah ia ka jingkylla ha ka jingtrei kam ka MPSC bad DSC.
Ka sorkar ka dei ban don ia ka Standard Operating Procedures, ka Acts ha kaba thung kam da ki Recruitment Boards. Pynduh ia ka Personal Interview ha ka Grade B, C bad D. Dei ban long kaba shai haba khot tender ia ki kam.
Dei ban don ka polisi ia ki kompeni shimet ban dei ban thung kam ia ki trai kylla,dei ban phah pynbna ia ka jingdon jingem jong ki nongtrei sorkar man u snem bad ban don ia ka Vigilance and Anti-Corruption Cell ne Directorate, dei ban weng na ka list ki riew lum jong u snem 1950.
