Tura, Jymmang 26: Ka Captain Williamson Sangma State University (CWSSU), Meghalaya, ha ka jingiatreilang bad ka International College of Payap University, Chiang Mai, Thailand, ka la pynkut da ka jingjop ia ka jingai jinghikai ba long ar sngi halor ka jingpyn kylla ia ka bor pyrkhat bad ka rukom pynwan dur ha ka pyrkhat pyrdain na ka bynta ka jingbha ka skul ha ki jaka ri lum bad nongkyndong.
Ia kane ka jingai jinghikai ba la pynlong ha ka 21 bad 22 tarik, Jymmang, la batai shaphang ka jingmut ba kylluid na ka bynta jong ki nonghikai, samla pule bad ki riewstad jong kane ka skul bah ha kaba iadei bad ka jingshisha jong ka rukom pule puthi ha ki nongkyndong bad ki shnong riewlum bad ka iathuh shaphang ka jingpyn khlain ia ki skul ha kine ki jaka.
Watla don ki nongkren ba na shabar kane ka ri, hynrei ka CWSSU ka la don haduh 41 ngut ki nongiashim bynta ha kane ka phyllaw skul, kynthup ia ki samla pule jong ka MA Education bad ki dkhot nongtrei na kylleng ki college ka jylla Meghalaya ba iasoh bad kane ka skul bah.
Ha kane ka jingai jinghikai, la don ka jingiakren shaphang ki nongiashim bynta ba kin long kiba shlur ban iamir jingmut halor ki jingeh ba ki shem ha ki skul ba jngai, kynthup ia ka jingduna ki nonghikai, ka jingbiang ki tiar ki tar, ka jingeh ban sngewthuh ha ka ktien bad ka jingiatreilang bad ka imlang ka sahlang.
Ia kane ka prokram, la plie pyrda da ka Vice Chancellor jong ka CWSSU, ka Dr. Vasanthi Vijayakumar, kaba la ban jur halor ka jingdonkam jong ka jingiatylli bad ka jingiasnohkti hapdeng ki jaka pule ka pyrthei kaba dei ban don ka jingkyrshan ban pynkiew bad pynroi ia ka pule ka dangle ha ka thain.
Ka Dr. Patchara, kaba dei ka Dean jong ka International College, Payap University, ka la kren halor ka jingiasnohkti lang ha kylleng ki ri kan iarap iaki nonghikai ba kin sngewthuh ia la ka jingshem jong ki bad pynurlong ia ki.
Ia katei ka prokram, la don ar ngut ki riewstad na America, u Dr. Brian Perkins na Teachers College, Columbia University, ha kaba u la pynithuh ia ki nongiashim bynta kiba la pynwan dur ia ka jingmut jingpyrkhat jong ki samla pule bad ka imlang ka sahlang ha kaban pynkyntiew ia ka pule ka dangle.
U Dr. Oliver “Ozzie” Crocco na Louisiana State University u la kren halor ka jingpynkylla ne pyniar ka bor pyrkhat bad ka sap ki briew(human resource development), da kaba pynleit jingmut halor ka jingkyrshan ia ki nonghikai, ka jingiar ka rukom jingialam bad jingpyntbit bad pynkylla ia ka rukom hikai ki nonghikai.
Katba ki nongiashim bynta ki batai shaphang ka jingiatreilang bad jingiasnoh, ha kaba ki la kren shaphang ka jingshisha kaba ki la shem ha ki skul bad ha shnong jong ki.
La iadon lang ha katei ka prokram da ka Dr. Geetam Chetry, Dr. Kanika Das bad u bah Deiborme Lyngdoh na ka tnat pule puthi, ka CWSSU, ryngkat bad u Dr. Chiche na Payap University.
Kine ki la pynpaw ia ka jingkyrmen ba kane ka jingiatreilang kan ialam sha ka jingiasnohkti ban wad bniah ha ka lawei, ka jingpynkylla nonghikai bad ka jingbteng ban kren halor ka jingpynbha ia ka pule puthi ha ki jaka ri lum bad ka kynhun imlang sahlang kaba la shah kyntait ha kylleng ka thain shathie bad thain sep ngi jong ka Asia.
