Shillong, Risaw 25: Ka Khasi Jaiñtia Welfare Association (KJWA), ha ka jingïatreilang bad ka Khasi Department, JJM Nichols-Roy College, Shillong, ka la pynlong ïa ka Lympung Saiñdur halor ka phang “Ka Kam Jngohkai Pyrthei bad ka Roi ka Par ha Meghalaya: Ki Lad, Ki Kyrpien bad ka Lynti Shakhmat” ha JJM Nichols-Roy Memorial Building, Qualapatty, Shillong ha ka 24 tarik Risaw 2026. Kane ka Lympung Saiñdur ka la long ruh kum shi bynta ïa ka jingrakhe Jubili Ksiar ka KJWA (1977–2027).
Ïa ka jingïalang plie la pynïaid da u Dr A. W. Rani, Convener jong ka Lympung, katba ïa ka jingkren maitphang la ai da u Dr Benjamin F. Lyngdoh, Associate Professor, Department of Tourism and Hotel Management, North-Eastern Hill University (NEHU), Shillong. U Prof. Desmond Kharmawphlang, Department of Cultural and Creative Studies, NEHU, u la long u shongknor jong ka sien shong banyngkong, katba ïa kawei pat ka sien shong la shongknor da u Bah P. R. Shabong, Assistant Professor, Khasi Department, Shillong College.
Ha katei ka Lympung Saiñdur, la wanrah haduh 10 tylli ki paper halor ki mat bapher bapher kiba ïadei bad ka kam jngohkai pyrthei, ka roi ka par, ka jingpynneh pynsah ïa ka mariang, ka kolshor tynrai bad ka jingpynmih ïa ki lad ïohkam ïohjam. Ki nongai paper ki kynthup ïa kine Dr. A. W. Rani, Bah Beilang R. Mawkhiew, Bah Tishu Khongsit, Bah Altar Liaison Khongthaw.
Dr. Bankerlang Kharmylliem, Bah Kitdor Halari Blah,Kong Valarene Moksha, Rev. Dr. S. Hayong, Dr. Teiborlang Dkhar, Kong Phinda Kyntiewlin Khongwir, Bah Ubahunlang Tmar bad i Kong Evaliza Khongsit.La ïoh ruh ïa ka jingïatai halor ki jingkylli bapher bapher na ki riewshemphang bad ki nongai paper.
La wan ïashim bynta da kumba 100 ngut ki briew, kynthup ïa ki khynnah pule na ka Tourism Department, ICFAI University, bad Khasi Department, JJM Nichols-Roy College, ryngkat bad ki nonghikai, ki nongwad bniah bad ki nongtrei ha ka kam jngohkai pyrthei bad ki dkhot jong ka seng KJWA.
Ha ka jingïalang pynhap pyrda, la ïoh ïa ka jingkynthoh na u Prof. Desmond Kharmawphlang. Kane ka seminar ka la long ka rynsan ban ïamir jingmut bad ban pynsngewthuh shuh shuh ïa ka jingdonkam jong ka kam jngohkai pyrthei kum ka lad ban kyntiew ïa ka ïoh ka kot, ban thaw ïa ki lad kamai jakpoh bad ban pynneh pynsah ïa ka mariang bad ka kolshor tynrai jong ka Jylla.
Ïa ka seminar la bei jingïarap da ka Meghalayan Age Ltd., bad KHADC Shillong. Ka Seng KJWA ka pynpaw ka jingsngewnguh sha baroh kiba la ïatreilang ban pynlong ïa ka seminar kaba seisoh.
