Mairang, Risaw 22: Kum shibynta jong ka jingrakhe ia ka jingdap 50 snem jong ka jylla Meghalaya, ka ophis u Block Development Officer, Mairang C&RD Block ha ryngkat ka jingiatreilang jong ka Meghalaya State Rural Livelihood Society (MSRLS) mynta ka sngi ka la pynlong ia ka Self Help Group (SHG) Mela bad Health Camp ha Madan Mot Tirot, Mairang Mission, Mairang.
Ha kane ka sngi u Lamphang ka Iing Dorbar Thawain ka jylla uba long ruh u MLA ka thain, u Bah Metbah Lyngdoh u la long u Kongsan ha ka jingdon ryngkat u EM ka KHADC ba dei peit ia ka tnat Ilaka uba long ruh u MDC ka Mawthadraishan, u Bah Jambor War uba la wan kum u symbud kongsan.
Kiwei pat kiba la iadon lang ha kane ka prokram ki kynthup ia u Syiem jong ka Hima Nongkhlaw, u Paiem P.M Syiemlieh, u Additional Deputy Commissioner ba dei peit ia ka Mairang Civil Sub-Division, u Bah A. Nongbri, u Block Development Officer ka Mairang C&RD Block, u Bah V Swer.
U Chief Operating Officer ka Meghalaya State Rural Livelihood Society (MSRLS), Shillong, u Bah Ronald Kynta, ki nongtrei jong ki tnat sorkar bapher bapher, ki nongialam shnong ka thain bad ki dkhot jong ki Village Organisation (VO) bad SHG bapher bapher hapoh ka Mairang Block.
Ha ka jingkren jong u kum u kongsan, u Lamphang ka Iing Dorbar Thawain ka jylla, u Bah Metbah Lyngdoh u la pynpaw ia ka jingkmen ban iadon bynta bad kane ka prokram bad u la ai khublei ruh ia baroh, kynthup ia ki nongtrei sorkar, ki rangbah shnong, ki dkhot jong ki Village Organisation (VO) bad SHG bapher bapher kiba la ia shimbynta shitrhem ban pynlong ia ka SHG Mela bad Health Camp kaba jop.
Haba kren halor ka National Rural Livelihood Mission (NRLM), u Bah Metbah u la ong ba ka jingthmu jong kane ka mission ka long ban kyntiew ia ka ioh ka kot jong ki paidbah kiba shong ha ki thain nongkyndong bad u la kyntu ruh ia baroh ba kin shimbynta ryntih ha ki prokram hapoh kane ka mission na ka bynta ban kyntiew ia ka ioh ka kot ka jongki.
U la ong ruh ba ka sorkar ka iai bteng ban pyntreikam pura ia ki skim bad prokram bapher bapher kum ka NRLM kum shibynta ban kyntiew ia ka ioh ka kot jongki paidbah bad u la pynpaw ruh ia ka jingsngewkmen ban iohi ia ka jingioh jingmyntoi jongki lyngba ki SHG ia kiba la la saindur lyngba ka NRLM.
Haba kren halor ka jingdap 50 snem jong ka jylla Meghalaya, u Bah Metbah u la kyntu ia ki paidbah nongshongshnong ba kin iai bteng ban ia snohkti lang bad ka sorkar ha ki prokram pynroi bapher bapher jongka na ka bynta ka roi ka par jong ki paidbah nongshongshnong ka jylla.
U Bah Metbah u la kyntu ruh ia ki paidbah nongshongshnong ki bym pat shim ia ka tika iada COVID-19 ba kin leit ai ia ka tika namar dei tang ka tika kaba long ka lad ban iada na ka jingsaphriang jong kane ka khlam ha ka ri bad ka jylla.
U Symbud Kongsan, u EM ka KHADC ba dei peit ia ka tnat Ilaka uba long ruh u MDC ka Mawthadraishan, u Bah Jambor War, ha ka jingkren jong u, u la kren halor ka jingiadonbynta jong u bad ki SHG ha ki por ba la leit noh bad la ong ruh ba ki paidbah nongshongshnong, khamtam ki riew kynthei ki ioh jingmyntoi shi katdei eh na ka jingdon jong ki SHG kiba plielad ia ki ba kin iashimbynta ha ka roi ka par bad ka ioh ka kot jong ka jylla.
Ha kane ka prokram la sakhi ruh ia ka jingpynshai paidbah halor kiba bun ki skim sorkar bad la iohi ruh ia ki jingshad, jingrwai bad ki skit da ki dkhot jong ki VO bad SHG bapher bapher jong ka Mairang Block. La ioh ruh ban sam khusnam sha ki VO bad SHG bapher bapher ha kane ka prokram.
