Shillong, Jymmang 20: U Executive Member ka Khasi Hills Autonomous District Council ba peit ia ka tnad Trade u Bah Winston Tony Lyngdoh u la ong ba ka Council kala pynphai noh ia ka pisa jong ki katto katne ngut kiba la ioh work order na ka Executive Committee barim jong ka Council ban buh khyrdop hynrei don ruh kiba la leit ban ujor sha iing bishar.
U EM ba deipeit ia ka tnad khaii pateng u bah Winston la ong ba ka jingpyneh na ki katto katne ngut kadei hadien ba ka Executive Committee kala hukum ne khot ban pynbeit biang lane recall ia kine ki 8 ne 9 ngut kiba la dep ioh ia ka work order ban buh khyrdop.
Haba kren bad ki lad pathai khubor, u Bah Winston Tony Lyngdoh u la ong ba ki don haduh 9 ngut kiba la dep ban ioh ia ka work order haduh ar snem ha shwa ba kin shimti ia ka Executive Committee ha KHADC.
U Bah Winston Tony Lyngdoh u la ong, “Hadien ba ngi la shimti ia ka Executive Committee ba thymmai ha KHADC ngi la khot ban pynbeit biang lane recall halor kane ka kam namar ba ngim sngew iahap ban ban pynthymmai haduh ar snem” u la ong.
“Ka EC mynta ka ai wai beit na ka bynta tang shi snem bad kane ka jingleh ka EC barim kim sngewiahap namar ba donkam ban ai lad ia kiwei ruh” u la ong.
U Bah Winston u la ong ba dei halor kane ka nongrim ba ki sa recall bad pynphai ruh ia ka pisa kaba ki la dep ban thep hadien ba ki la wan ban ia kynduh ia ki bad kiba la ioh ia ka jingpynshai hynrei don pat kiba pyneh bad kiba la leit ban tied jingkhang sha ka iing kashari ha kaba iadei bad kane ka kam.
