Shillong, Nailar 21: Ka Federation of Khasi Jaiñtia and Garo People (FKJGP) Central Body ka dap da ka jingsngewkhia kaba khraw halor ki kynrum kynram kiba la mih hadien ka jing shim sting jong ka sorkar jylla ia ki mat jingdawa ba buh da ka Khasi Students Union (KSU).
Kum ka seng kaba don ia ka jingkitkhlieh kam kwah satia ba ki kynrum kynram kin dang iai bteng hynrei kala dei ka kamram jong ka sorkar ban pynbeit mardor ha shwa ba ka por kan dier, ha kajuh ka por na ka liang jong ka FKJGP ka pynrem jur iaka jingleh riewkhlaw jong ki bor pulit ban khynra wat ha ka ophis treikam jong ka KSU da kaba pynjulor ruh iaki tiar ki tar bad khamtam eh ba ki da pyndonkam tear gass bad kiwei kiwei ki tiar pynmynsaw la kumba leh ha ki por ba khynra ia ki seng kieng atiar.
Katei ka jingleh riewkhlaw jong ki pulit ka la pynher syrngiew ruh ia ki paidbah nong shnong shnong, ki khyllung khynnah bad wat ia ki nongpang kiba thiah pang ha Robert Hospital, ym tang katta ki bor pulit kila pynjulor ruh wat ia ki ing ki sem kiba don marjan bad ka ophis treikam jong ka KSU.
Kum kitei ki jing jia kidei ki ba ym lah satia ban pdiang da ka seng bad ka imlang ka sahlang hi baroh kawei bad na ka liang jong ka FKJGP ka kyntu ia ki bor sorkar ba ki dei ban teh lakam ym ban ai laitlan than iaki bor pulit ban pyndonkam bakla ia ka bor khnang ba kin ym mih satia ki jingjia kiba sngewsih.
Hooid kum ka seng ka tip bad sngewthuh shai ba ki bor jong ka ain ki don la ka jong ka bynta ban leh ban ban pyndep iala ka jong ka kamram hynrei dei pat ban leh da ka lynti kaba dei khnang ba kan ym long pynban sa kaba theh da ka petrol ha ka ding kaba la sdang ban klang ioh kan ktah shuh shuh iaka jing shongsuk shongsain.
Ha kajuh ka por na ka liang jong ka FKJGP ka kyntu ia ka sorkar jylla ba kadei ban shimkhia ruh mardor ia ki kynrum kynram kiba la sdang ban ialam bakla da mano re mano iaki kynhun niah kali tourist na ka jylla Assam tang na ka daw kaba rit ia kaba la pyrshang ban shim kabu da mano re mano ban pynsniewdur ia ka jingiajan hapdeng ka jylla Meghalaya bad Assam kiba dei ki jylla kiba marjan.
Ha kajuh ka por na ka liang jong ka FKJGP kum kawei na ki kynhun kaba don ha ka shatri jong ka North East Indigenous People Forum (NEIPF) kala dep iakren ruh bad ki nongkitkam ba na ka jylla Assam kumno ban tehlakam bad ban bteng ruh ia kam ki jam kumba ju long baroh shi katta khnang ba kan ym ktah satia ia ki nongleit nongwan na baroh ar tylli ki jylla.
ka FKJGP sa shisien pat ka kyntu ia ki bor sorkar ba kam dei satia ban shu khein sting ia kine ki jinglong jingman hynrei kadei ban wad ia ki lad ki lynti katba ka por ka dang biang lym kumta ka sorkar hi kan hap ban shim ia ka jingkitkhlieh lada mih shuh shuh kino kino ki kynrum kynram kiba ktah ia ka shongsuk shongsain.
