Shillong, 29 Nailur 2026: Ka MIT School of Nursing, MIT University kaba don ha ka jylla Meghalaya, kala pynlong da ka jingrakhe da kaba tba da ki jingba ding bad ryngkat ka bam smai na ka bynta jong ki samla pule jong ka 2nd Batch of General Nursing and Midwifery (GNM) ha ka 29/Nailur/2026 ha katei ka skul bah.
La ai kyrteng ia katei ka jingrakhe da “Ka jingshai iaka jinglong briew: Ka jingsdang jong ka jingaiti ha ka jingim ban sumar,” ha kaba katei ka jingrakhe ka pyn kynmaw ia u maw jam ba kongsan iaka jingiaid lynti jong ki samla pule ha ka kam nos, kaba pyni ruh iaka dak jong ka jingsdang jong ka kam kaba pynshong rynsan halor ka jingtip, ka jingisynei, ka jingkitkhlieh bad ka jingshakri iaka imlang sahlang.
Katba ka jingba iaka sharak ka dei ka bynta ba donkam bha jong kane ka jingrakhe, kaba pyni ne btin iaka jingshai ka jingtip, ka jingkyrmen bad ka jingisynei kaba ki nos ki rah ha ka kam shakri jong ki. Ki samla pule haba kila ba iaki sharak, kato ka por ka pynpaw iaka jingkular jong ki ban shakri iaki paidbah bad sumar iaki briew bad shakri iaki da ka burom.
Hadien kane, la bud da ka jingbam smai, ha kaba ki samla pule kila da ka dohnud kaba shai bad bakhuid ban bat skhem iaki jinglong kiba kyntang bad ki jingkitkhlieh jong ka kam nos. Kane ka jingbam smai jong ki ka pyni iaka jingkular jong ki ban ai iaka jingsumar kaba kyntang, kaba bit ba biang bad kaba sngewsynei bad ban shakri iaki nongpang, ki longing longsem bad ki shnong ki thaw da ka jingkhuid ka mynsiem bad ka jingaiti kaba pura.
Ha katei ka jingrakhe, u Dr. Debmalya Bhattacharya, Pro Vice Chancellor bad Registrar, MIT University of Meghalaya, u la kren iaki samla pule shaphang ka jingkit khlieh kaba wan lang haba la rung ha kane ka kam sumar nongpang.
U la pynshlur iaki ban shimkhia iaka kam jong ki lem bad ka jingsngew ia kiwei, ka burom ka akor bad ka jingmut jong ka jingthmu, katba ki dei ban iai bteng ka jingtrei jong ki bad pynbit pynbiang iaka jingsumar kaba bha tam iaki nongpang.
U la ban jur da kaba ong ba ka kam nos kane ka kam sumar iaki nongpang ka donkam ka buit bad ka jingstad bad kiwei kiwei bad ka donkam iaka jingsngew rit sngew synei, jingiai shah, jingshlur bad ka jingkular na ka bynta ka bha ka miat jong kiwei. Ki samla pule kila shah pynshlur ba ki dei ban neh kum kita ki nongioh jinghikai kiban ai jinghikai ia kiwei ruh bad ban iai trei minot ha ka kam jong ki.
