Shillong, Jylliew 08: Ki riew sniew kiba ym lah ban tip kila thang saw tylli ki kali sorkar ha ka step sngi Saitjain shiteng synia ha ki jaka bapher bapher kane ka nongbah Shillong bad ki pulit mynta ki dang tohkit ban lap ia kiba don kti ha kane ka kam runar.
Ki kali kiba la shah thang ki long, kawei hajan Synod College kaba hap ha Lumdiengjri Police Station, ka kawei Nongmynsong kaba hap hapoh ka Nongmynsong Police Outpost, kawei ha Mawlai Phumuri kaba hap ha Mawlai Police Station bad kawei ha Kenches Trace kaba hap ha Laban Police Station.
Haba kren ha ki lat pathai khubor u myntri rangbah ka jylla u Conrad K. Sangma u la ong ba u dang hap ban peit ia kata, hynrei u la ong ba kata ka jingjia kam shym don kano kano ka jingktah ia ka shong suk shongsain, u la ong ba un sa peit ynda u la ia kynduh ia ki ophisar.
