Shillong, Jymmang 07: Ka KSU South West Khasi Hills District ka la phah da ka jingujor sha ka Deputy Commissioner da kaba kynthoh jur ruh halor ka jingdkoh ka tnad Supply jongka District ban pyniaid bei
t pyniaid ryntih iaka jingsam marbam haka District haba iadei bad ki marbam lyngba ka scheme PMGKAY bad ki marbam rashon baroh shikatta.
Ka seng ka la lap ba ka jingsam iaki marbam lyngba ka scheme PMGKAY sha ki longing AAY bad PHH, ki don ki jaka ba u khaw u poi biang kilograms shaki dealers hynrei ki don pat katto katne ki dealers ki la shu shim 1 ne 2 tyngka shi kilogram ne don pat kiba shim haduh 10 , 20 bad 50 tyngka na uwei u nongioh iaki marbam ration card holder.
Haba iadei bad kane ngi la pyrshang ban wad jingtip ha kaba ki don ki dealers kiba ong ba kim banse ban hap ban shim pisa naki nongioh marbam namar ki don ki wholesalers kiba oh dor bai daju bad bai kit bai bah kumjuh naki dealers. Kane ngi sngew ka long pyrshah iaki kyndon jongka sorkar namar haka jingshisha ka sorkar ka la pynbiang iaka bai kit bai bam jongki dealers ne wholesalers.
Kum ka seng kila iakren ia kane ha kaba ka DC ka la kular ban ong ia baroh ki dealers ne wholesalers ba shim pisa na u khaw ba khlem siewdor lyngba kane ka scheme ba ki dei ban pynphai iaka pisa ba ki la shim beain naki paitbah. Ka tnad Supply kam dei ban shu leit ong pyndeprukom iaki dealers ba kin pynphai iaka pisa ba ki shim tam hynrei ka dei ban pynthikna ruh ba uwei pa uwei uba ioh iaki marbam u dei ban ioh pat Iaka pisa ym ban shu pyndep rukom.
Kum ka seng lyngba ki units bapher bapher jongka ha South West Khasi Hills District ngi la lap ruh ba don ki jaka ba watla ki dealers ki khlem phah siew pisa haki nongioh marbam hynrei ka jingpoi u khaw sha ki dealers ka duna naba ki wholesalers ki ju ot kilogram nalor ba u khaw u la duna kilogram lypa na kaba dei ban ioh.
U khaw ba la mang lyngba kane ka scheme um shym la poi sha ki dealers kumba la khmih lynti bad haba ka seng kala pyrshang ban wad jingtip ngi iohsngew ba ka don ka jingiakynnoh ba u wholesalers u ioh duna khaw napoh ka kudam FCI bad ki dealers ruh ki ioh duna khaw naki wholesalers kaba ha kaba kut dei u paitbah uba hap ban mad iaka jingshah ot kilograms iaki marbam bad uba mat iaki jingeh.
Kane ka la pynlynngoh iangi kum ka seng bad ngi sngew ba kane ka dei ka jingdkoh jong ka jingtreikam jongka Tnad Supply jongka District ha ka ban tehlakam ia kiba kum kine ki jingjia.
Ym dei tang mynta ka kynti lyngba ka scheme PMGKAY hynrei ka long kumjuh ruh haka jingsam shaki paitbah ia u khaw ne kiwei kiwei ki marbam rashon ba ju sam baroh shikatta lyngba ka Food Security System ba la tip kum ka Public Distribution System naka por sha ka por.
Haba iadei bad kine kiei kiei naka liang jong ka seng ka dawa na ki bor District ba ki dei ban thung iaka kynhun tohkit ba bniah ym ban shu leh pyndep rukom halor kane ka bynta. Ha ka juh ka por ruh ngi dawa naka DC bad khamtam iaka tnad Supply jongka District ba ka dei ban pynthikna ban nym don ka jingot kilograms naduh na ka Kudam FCI bad na ki wholesalers ne dealers nangne shakhmat .
Ka KSU jong ka SWKH District ka khmih lynti ba ki bor District bad ka tnad supply ba kin shimkhia ban iada naka jingjah kilograms shiteng lynti jongki marbam ne ban pyllait na kano kano ka jingbamsap halor ki marbam ba dei ban ioh daki paitbah jongka South West Khasi Hills District . Kane ka long katkum kyrwoh bala phah da u samla Forwardman Nongrem, President KSU South West Khasi Hills District.
