Shillong, Naitung 30: Hadien ba u bah Ronnie V Lyngdoh MLA ka Mylliem Constituency u la phet noh na ka seng Congress bad pynpaw ba un sa leit ban iasoh noh bad ka seng National People Party, ki nongialam ka Meghalaya Pradesh Congress Committee ki la kynnoh ba kine baroh ki jia dei ba ka NPP ka khlaiñ ban khroh briew bad ban thong bad ia kane kin nym sngew phylla shuh.
Ha ka jingiakren u bah Manul Badwar u la pynpaw lehse kane ka dei ruh shibynta ba ka NPP ka tieng ia ka jingmudui pyrshah halor ka jingpyniasoh ki laingut ki MLA ka seng Congress ha u snem ba la dep kata u Dr Celestine Lyngdoh MLA na Umsning Constituency, u bah Charles Marngar MLA na Mawhati Constituency bad u bah Gabriel Wahlang MLA na Nongstoin Constituency.
Namar ha ka jingmudui u bah Ronnie V Lyngdoh u dei u ba la ialamkhmat, kumta da kaba khroh bad lah ban pynphet seng ia u, kane ka mukotduma kan kut noh bad hap ban sdang na ba sdang.
U bah Manual Badwar u la ong ka jingphet seng noh u bah Ronnie V Lyngdoh ka la long ba u la shet kylla ia ki paitbah ka Mylliem Constituency kiba la pynjop, namar ha ka por ba ki vote, ki paidbah kim peit eh tang ia u, hynrei ki peit ruh ia ka nongrim jong ka party Congress.
U bah Manul u la ong ban ong ba ka party Congress kan sa duh noh ha Meghalaya ka long kaba ymlah ban long, namar kumba long mynta, watla ha Meghalaya kam don shuh ki MLA ne MDC. Hynrei ha parliament ka seng Congress ka don 100 ngut ki MP bad ka seng Congress ha Meghalaya ha u snem 2029 kan sa ïeng rasong biang.
