Shillong, Nohprah 19: Ka Plenary kaba 72 jong ka North Eastern Council (NEC) kandon ki jingialang kiba kongsan ban sdang ha ka 20 tarik Nohprah, 2024. Ka jingialang mynta u snem kan sdang da ka bynta teknikal jong kane ka plenary ha Agartala, Tripura, ka nongbah kaba don ka histori kaba iar. Ka nongbah ka la ioh ban pynlong ia ka plenary ha ka sien kaba ar naduh u snem 2008.
Ha ki jingialang Pre-Plenary Thematic bad Technical ha ka 20 tarik Nohprah, ki tnad sorkarpdeng kin pyni ia ki jingpynkhreh ban wanrah ka roi ka par, bad ka jingpynkhreh ia ki kam ki ban wan na ka bynta ka thain shateilammihngi.
Ka plenary kaba kongsan, kan sdang ha step jong ka 21 tarik Nohprah, 2024 ia kaba yn pyniaid da u Myntri Kam Pohiinguba dei ruh u Chairman jong ka NEC, Amit Shah, lem bad u Myntri ka Tnad DoNER, Jyotiraditya M. Scindia bad u Myntri Khynnah, Dr.SukantaMajumdar.
Kane ka jingialang kan don ki jingiamir jingmut, ha kaba arngut ki dkhot jong ka NEC, ki Lat, ki Myntri Rangbah, ki Chief Secretary, bad ki Planning Secretary jong phra tylli ki jylla ka thain shateilammihngi, kumjuh ruh ki heh ophisar kin iashim bynta shitrhem.
Ka jingjied ia ka Agartala, na ka bynta kane ka jingialang kaba kongsan ka pyni ia ka bynta jong ka ha ka roi ka par jong ka thain. Ha ki por ba la depia ki jingialang plenary la pynlong bha ha nongbah Shillong bad Guwahati. Hynrei ka jingjied ia ka Agartala ka pyni ia ka jingiar ki kam jong ka NEC bad ka jingkut jingmut jong ka ban kyntiew ia ka roi ka par ha baroh ki bynta jong ka thain.
U Secretary jong ka NEC, AngshumanDey u la kren halor ka jingkongsan jong kane ka plenary bad ka bynta jong ka NEC ha ka roi ka par jong ka thain. U la kren shaphang ka thong jong u Myntri Rangbah duh, ha kaba la rakhe ia ka thain shateilammihngi kum ka ‘Ashta Lakshmi’— ka dak jong ki lad kiba bun bad ka jingriewspah ka deiriti.
Ka bynta jong ka NEC ka la kylla naduh ba la sdang ia ka, ha kaba ka la kylla na ka kynhun ai jingmut sha ka kynhun kaba pynkhreh kam na ka bynta ka thain.
Hynrei, ka thong ba kongsan jong ka, ka iaineh khlem kylla; ban pynsted ia ka roi ka par ha ka imlang sahlang bad ka ioh ka kot bad pynthikna ka jingryntih bad baroh ki jylla jong ka ri lyngba ka jingkyntiew ia ki lad jingpyniasoh, ka jingkyntiew ia ka bor treikam bad ka jingbei tyngka ha ki kam bapher bapher.
La seng ia ka NEC ha u snem 1971 bad la pliepaidbah ha nongbah Shillong ha u snem 1972 da ka Myntri Rangbah duh Indira Gandhi. Une u mawmer u long kum ka dak jong ka por jong ka jingkylla ha kaba iadei bad ka roi ka par kaba la pynkhreh bad pyniaid lang.
Ka jingkylla ka council, ba kynthup ka jingkynthup ia ka Sikkim ha u snem 2002 bad ka jinglong jong ka kum ka kynhun pynkhreh kam ia ka thain, ka pyni ia ka kam kaba dang iar jong ka bad ruh ka jingkiew ka jingkongsan jong ka.
Ki jingjop jong ka NEC ha kine ki phew snem, naduh ka jingshna palat 11,500 kilometer ki surok haduh ka jingkyntiew ia ka jingpynmihbording bad ka jingkyntiew ia ki jingdon jingem ba iadei bad ki kad liengsuin.
Ki kam jong ka council ki kynthup ia ki jaka treikam ba kongsan kum ka Regional Institute of Medical Sciences (RIMS) bad ka North Eastern Electrical Power Corporation (NEEPCO), bad kiwei kiwei.
Ki sienjam ba dang iaidshaphrang bad ka jingsdang ia ka skhim PM-devINE ka kdew shuh shuh ia ka bynta ba kongsan jong ka NEC ban pynurlong ia ka thong jong u Myntri Rangbah duh Narendra Modi na ka bynta ka thain shateilammihngi.
Katba ka Plenary kaba 72 ka la nang jan, ka bynta ba kongsan kalong halor ki sienjam jong ka NEC ban shim ia ki lad kiba bun ha ka thain bad ialam lynti ia ka thain sha ka roi ka par ka bym pat jusakhimynshuwa.
Katba ki jingkyrmen ki long kiba heh, ka Plenary kaba 72 jong ka North Eastern Council ka kular ban long ka por kaba kongsan ha ka jingiaid lynti ka thain sha ka lawei kaba seisoh.
