Shillong Lber 27: Ka jingialang ka Dorbar Hima Mylliem kaba la lum bad khot da u Syiem Mylliem kaba la long mynne ka sngi 26 tarik March 2013, ban ia kren halor ka Amendment ia ka Sixth Schedule, hapoh Khasi National Dorbar Hall, Shillong hadien ka jingiatai kaba sani bha ka la rai kumne harum:
Ban thung ia ka Legislative Committee kaban kynthup 40 ngut (10 ngut ki Myntri, 10 ngut ki Nongsynshar Raid, 10 ngut ki Rangbah Shnong, 5 ngut ki nongaibuit / ki pleader ha ryngkat u Syiem kum u Chairman, bad Syiem Khynnah kum u Vice-Chairman) ban bishar bniah ia kine ki kyndon thymmai jong ka Sixth Schedule bad la ai bor ha u Syiem ban thung bad ban co-opt ia kino kino ki dkhot katkum ka jingdonkam jong ka kam
Ba katei ka Legislative Committee kaba sawphew ngut kin ia kynduh ha ka 15 tarik April 2013 hapoh iing Dorbar Hima Mylliem
Ba katei ka Legislative Committee kan ia kynduh lang ban ia kren sngewthuh jingmut bad ki 14 ngut ki MDC, KHADC ha ka 24 tarik April 2013 kiba don hapoh ka Hima Mylliem
Ban rah ia katei ka report na ka legislative Committee hakhmat ka Dorbar Hima kaban sa lum biang ha ka 1 tarik May 2013 hapoh iing Dorbar Hima Mylliem.
Ban kyntu jur ia ki bor KHADC bad Sorkar Jylla ba ki dei ban buh jingmut ia ki kyndon jong ka Instrument of Accession and Annexed Agreement 17 August 1948, haba ia kren halor ka jingpynbeit thymmai ia ka Sixth Schedule, khamtam haba ki Hima Khasi States ki don ka kyrdan kaba kyrpang hakhmat ka Constitution ka Ri India kumba long ka jylla Jammu & Kashmir, ha ka Article 370.
La kyntu ia baroh kiba kwah ban ioh ia ka proposed amendment jong ka Sixth Schedule ban wan shim copy na ka office iing Dorbar Syiem Hima Mylliem.(SP News)
