Shillong Nohprah 02: Ki nongialam Sengbhalang kila iakynduh hynne ka sngi ha kaba da kawei ka sur kila rai ban bteng ia ka jingiakhih ka jongki ban pynbor ia ka sorkar jylla ban pyntreikam noh ia ka Inner Line Permit (ILP) ha kane ka jylla ban iada na ka jingwan rung kyrthep ki mynder.
U Vice President ka Khasi Students Union (KSU) u samla Fredrick Kharmawphlang ula ong ba ki sengbhalang kila rai ban pynlong ia ka Pakhang Surok Miet ha ka 4,5 bad 6 tarik mynta u bnai kaban sdang naduh ka por 9 baje mynmiet bad kut pat ha ka por 5 baje mynstep.
Ula ong ruh ba ki sengbhalang kila shim ia kane ka rai namar ba ki don ka jingpyrkhat na ka bynta kito ki samla pule kiba don hapdeng ki jingleh eksam bapher bapher bad dei halor kane la pynjynsur ia ka por jong ka jingiakhih bad ula kyntu ia ki paidbah ban iai shah bad ka jingdawaki sengbhalang kiba ieng triang ban dawa na ka sorkar ban pyntreikam ia ka ILP.
“Lada ka sorkar ka dang iai kuman nangne shakhmat bad ka pyneh ia ka sur jong u paidbah uba la pynpaw lyngba ka jingialang kaba la long ha ka 30 tarik ha Madan Student, kum ki sengbhalang ngin pynjur ia ki jingiakhih la ka long ha kano kano ka dur namar kumba ki paidbah ki angnud ki sengbhalang ruh ki angnud ban don ia ka jingiada kaba kyrpang ia ka jaidbynriew bad ia ka jylla hi baroh kawei” la ong u Fredrick.
“Jia katba jia ngi lah pynhreh lypa ki jingiakhih kiba jur tang shu kut eksam ki samla pule , katta ka sorkar ka dang kuman katta ngin nang pynjur arshah laishah sawshah ki jingiakhih, namar kane kadei ka jingialeh ka jingdawa jong ki trai muluk ban lait na ka jinglong mraw bad ka jingshah tyllep ha ki bar jylla. Ko sorkar sngap ia ka sur u paidbah bad pyntreikam ia ka ILP, lym kumta ka ding ba shyrkhei kan klang hapoh ka jylla hi baroh kawei bad lada jia kumta ka sorkar hi ka hap ban shim ia ka jingkitkhlieh” la ong une u nongialam ka KSU.
“Lada ka sorkar ka dang iai mutlop bad iai kuman, ki sengbhalang kin iaid shkhmat bad ki jingiakhih bad yn iai pynjur shuh shuh ia ki jingiakhih nangne shakhmat haduh ba ka sorkar kan iohsngew da la ki jong ki shkor bad haduh ban da kohnguh ban pyntreikam noh ia ka ILP ka bym dei tang ka jingdawa ki sengbhalang hynrei ka sur jong u paidbah ka jylla hi baroh kawei.
Ula kyntu ruh ia ki paidbah ba kin long kiba iai shah namar ha ki jingiakhih hap ban iakynduh ia kiba bun ki dieng pynkiang shwa ban poi sha ka thong bad hap ban iaiad lyngba ki jingtynjuh, ki mawjynthut hynrei da ka mynsiem iaishah bad ka jingieit jaidbynriew hi yn lah ban poi sha ka thong kaban long ka jingmyntoi ym tang ia kane ka pateng ba mynta hynrei ia ki pateng ban dang wan kiban ioh shongsuk shongshngain bad long ki trai ha ka jylla hi baroh kawei.(SP News)
