Shillong, Naiwieng : Wat hadien ka monolith festival ki paidbah nongleit shangkai na kylleng ki jaka ki dangiaid tud sha ka heritage village ha Mawphlang, ka executive committee dangshen ka la rai ban khrong pisa na ki nongleit jngohkai ia katei ka shnong pyninam ia ka culture u Khasi ne ka Heritage Village, ban pynih pisa ia ka council hapoh ka jingpeit ka Management Committee bad ka jingmih na kane yn iasam mar shiteng bad ka hima Mawphlang, la iathuh ba bah Teinwel. EM i/c Art and culture.
Ia kane yn sa pyntreikam shen hadien ba la dep pynkhuid ia ka jaka bad ka MC shong pyrkhat katno kan shim ban krong na ki nongleit shangkai.
Haba iakren bad u Peitngor u Bah Teinwel ula ong, “Ka council ka la pynlut 20 lak ban shna iing ia ki hima hapoh ka Heritage Village, kaba long katkum ka mang pisa ba la phah da ki hima bad hadien ba la dep bishar bniah plan na ki hima ryngkat bad ki Engineer na ophis ki sa pyllait ia ka pisa, bad ia ki nongshim bynta kiba la wan jan baroh ki hima ban pyni ia ka riti ka dustur tynrai bad ban pynbit pynbiang ia ka jaka bad kiwei ki jingdonkam.”
Ia mynta um pat lah ban tip haduh katno ka jinglut baroh ha kane festival namar ka Khasi Heritage Conservation Forum kaba la iatreilang kam pat ai jingkhein satia, katno ka ioh lum bad katno ka la pynlut, ula bynrap ba katkum ki jingtip u la ong, ki don ki kompani bad ki tnad sorkar kiba la noh synniang ban iarap pisa na bynta katei ka festival sha ka KHCF kynthup ia ka tnad Arts and Culture, Tourism ka Lafarge bad kiwei ki kompani. “Ka KHCF ka dei ban ai noh ia ka jingkhein la kumno kumno hapoh ka shitatiew,” ula bynrap.
Ha kane ka sien banyngkong ki don kumba 10 tylli ki hima kiba la wan ban shna iing kynthup ia ka Hima Mylliem, Nongkhlaw, Jirang, Sohbar bad kiwei, kaba la pyniphuh iphieng ia ka tamasa pynirong pynirup tynrai ka KHADC ban pynim bad pynneh ia ka culture u khun Khasi.
“Ngam poi pyrkhat ba ki briew kin tuid sha kane ka Monolit Festival wat hapdeng bun ki jingduna, hynrei ka long ka jingjop ia ka council ban pynurlong ia ka jingangnud kaba la slem,” la pynpaw u Bah Tein da ka jingkmen ba kane ka festival ka long ban pyni sha ka pyrthei ia ka culture u Khasi hapoh ka Bri u Hyniewtrep.
U la ong, katkum ka jingiateh soskular ka jinglut na bynta kane ka festival ka ban long man u snem yn bei da ka Council, ula ong bad bynrap ba Executive Committee dangshen ka la thaw ia ka Management Committee ban khlieh da u EM i/c Art and Culture kum u Chairman bad u Secretary na ka Hima Mawphlang na bynta ban peit ia ka Heritage Village. (SP News)
