Shillong,Naitung 12: Ki Non Governmental Organization (NGO) ki la shimia ka rai pynbor iaka sorkar jylla ba ka dei ban pyntrei kam noh ia ka Inner Line Permit(ILP) ha ka jylla ban ia da na ka jingwan tuid kyrthep ki myntder ri.
U president jong ka seng FKJGP u Bah Joe Marwein u la ong ha ki nongthoh khubor ha dien ka jingialang ki la shim ia ka rai ban khot ia ki jingialang paidbah ha baroh hynriew tylli ki district jong ki ri lum khasi bad jaintia ban pynshai paidbah.
Kin sdang ia kane ka jingialang paidbah na Ri Bhoi District ha ka 18/7/2013 ha Nongpoh . ha ka 20/7/2013 pat kin pynlong ha Mawkyrwat , ha ka 22/7/2013 pat ha Khliehrait jong ka East Jaintia Hills District, Ha Nongstoin jong ka West Khasi Hills kan long ha ka 24 tarik bad 29/7/2013 pat kan long ha Jowai West Jaintia Hills District.
Ia ka jingialang paidbah kaba khatduh kin pynlong ha kane ka nongbah Shillong ia ka tarik kim pat buh. Kaei kaba ki seng bhalang kin sa shim ia ki rai ha kaba ia dei bad kane ka kam ban pynbor ia ka sorkar ba ka dei ban pyntrei kam noh ia ka ILP ha kane kajylla.
U President jong ka KSU u Bah Daniel Khyriem u laong ba ia ka ILP la pyntrei kam ha kane ka jylla ha u snem 1973 hynrei ka seng ka kwah ban ong sha ka sorkar ba ka dei ban pyntrei kam ia ka ILP kat kum kane ka juk kaba mynta.(SP News)
