Shillong, Kyllalyngkot 13: Mynta ka sngi la lah ban pynbiang lut nadong shadong ia ka P A Sangma Stadium ha Tura ban pynlong ia ka 5th Meghalaya Games 2024 ka ban sdang ha sngi nyngkong ban plie da ka President jong ka Ri India ka Droupadi Murmu.
Kane ka jingialehkai 5th Meghalaya Games 2024 kan long ka jingsah kynmaw ha ki jingialehkai ha kane ka jylla namar ka long ka sien kaba nyngkong ba ka President jong ka Ri India kan wan ban plie ia kane ka jingialehkai.
Ki nongialehkai mynta ka sngi kila poi lut ha Tura na kylleng ki bynta jong ka jylla Meghalaya bad la khmih lynti ba baroh kin poi 3000 ngut ki nongiashim bynta ha ki 23 tylli ki jait jingialehkai kiba la pybiang na dong shadong bad kyrmen ba kan long kaba iaid beit iaid ryntih.
U myntri rangbah ka jylla u la shim khia hi da la de ban peit ba ka jingpynkhreh baroh ka long kaba iaid beit ban pynthikna ki jingialehkai baroh kin iaid beit iaid ryntih ha kine ki hynriew sngi jong ki jingialehkai.
