Shillong, Kyllalyngkot 24: u Prabitra Manu Pradhan u ba dei peit ia ka “Odisha State Maritime Museum” kaba don ha Cuttak ha ka jingleit jngoh ki nongthoh khubor na Meghalaya ia katei ka jaka kaba la pynbeit da ka Press Information Bureau (PIB) u la batai ia ka jingdon kam ki Museum.
Ha ka jingiakren bad ki nongthoh khubor na Shillong, la pynsngew ba ka por kala dei ba ia ki Museum dei ban pynrung noh ha ki kot pule khnang ba ki long dien kin tip ia ka mynnor. Ka jingtip ia ka mynnor ka pynkhlain iaka jinglong tynrai.
La ong ba kumba ka long mynta, ia ki jingjia kiba la dep la buh ha ki Museum bad tang kiba wan kai ki ioh bad kiba wan ban pule bniah dei tang ki nongwat bniah bad kine kiba tip ki kut noh tang ha ki jingthoh.
Kumba ka long mynta ki don ki Museum ha kylleng ka Ri India bad kine ki jaka ki dei ki jaka buh nam ia kiei kiba jai ha ka mynnor bad dei tang ha kine ki jaka ba ki long dien mynta ki ioh ban pule bniah.
Kaba kongsan ka long ba lada ki bor sorkar ki pynrung ia ki Museum kum kawei na ki subjek ha ki jaka pule kan long ka jingtip myntoi ia ki long dien, kane ka jingbym pynrung sha ki jaka pule ka buh ia ki long dien ban nym tip ia ka mynnor.
