Shillong, Kyllalyngkot 26: Ha jingkren jong u Lat ka jylla u Phagu Chauhan mynta ka sngi ha Polo ban rakhe ia ka jingdap 75th ka Republic Day kala dew shai ba lyngba ka skhim “Green Meghalaya” kila don haduh 1500 tylli ki shnong kiba la ioh ia ka jingiarap haba pynneh pynsah ia ki khlaw ki btap.
Kane ka jingiarap pisa ha dur jong ka kran ka long man la u snem bad haduh mynta la lah ban pynneh pynsah ia ki khaw haduh 27,000 hektar ki khlaw ki btap, kane ka dei ka jingtrei kaba ka sorkar kala pyntreikam ban pynneh pynsah ia ki khlaw ha ka jylla.
Ka jylla Meghalaya ka dang don haduh 76% ki khlaw kiba khlem pat ktah, ki don 50,000 tylli ki tyllong um bad ka don haduh 30,000 hektar ka jaka balong sngem, hynrei kine baroh mynta ki don ha pdeng ka jingma na ka daw jong ka shong kylla ka suin bneng, na kane ka daw ba ka sorkar kala mang 15% ka pisa ban pynneh ia ka mariang.
Haka juh ka por ka sorkar kala dep ban shna haduh 27,000 tylli ki jaka pynneh um lyngba ka skhim MGNREGA, 600 tylli ki jaka pynlang um kiba lah ban pyndonkam ha bun ki liang bad ia ki la shna ha ka jinglut kaba la kot sha ka T.750 klur ha kylleng ka jylla da ka jingbei pisa na ka Asian Development Bank.
Ha kane ka sngi na ka liang jong u lat ka jylla u la kdew ruh ia ki bun bah ki kam kiba sorkar kala leh bad kiba ka sorkar kan dang pyntrei na ka bynta ban kyntiew ia ka jylla ha ka roi ka par bad ka ioh ka kot, ha kane ka sngi ki don bun bah ki paidbah ban ia shakhi lang ia kane ka jingrakhe ia ka Republice Day.
