Shillong, Kyllalyngkot 29: Ka Seng Khasi Kmie lyngba ka Lum Sohpetbneng Kommittee ryngkat ka Komiti u Tymmen u San hapoh ka jingialam u shongknor u Rgh Skor Jala ki la lah ha kaban pyndep ia ki lai tylli bynta jong ka nguh ka dem ka dwai ka phirat bad ka knia ka khriam, ia kaba la juh tip ia ka kum ka Lehniam ka Shi Hat Shi Taiew shwa jong ka kiew Eh Rngiew sha u Lum sohpetbneng kaban long ha ka 4 tarik u Rymphang 2024.
Haba ia kren bad u shongknor ka Lum Sohpetbneng Committee u Rgh I. Sun, u iathuh ba barabor la shu sdang shwa na Lum Dorbar, Lawnongthroh, ha kaba la ieng ia ka khnong ka bishar bad ka iapan na U Trai Kynrad u Nongbuh Nongthaw bad ha kane ka kynti ka long kaba sngewtynnad ba kiei kiei baroh katta naduh ka nguh ka dem bad ki jingdwai baroh ka beit ka biang bad iaid ryntih lut.
Hadien ba la dep na Lum Dorbar, la dei pat saka bynta kaba ar ban leit sha ka Mei Mawbuh ban pynsum pynsleh ia ka ban nguh ban dem ryngkat ka jingpyndep ia ka lehniam kaba long da kawei ka syiar kynthei bad uwei u syiar shynrang, kaba hangne ruh haba khmih ia ki dak ki shin baroh ki bit ki biang bad u ngeit skhem ba ka kiew Pyneh Rngiew mynta u snem kan long kaba da phuh da phieng.
Hadien ba la pyndep ia ka lehniam na ka Mei Mawbuh, la dei pat sa ka pali ban kiew sha ka duwan jong u Sohpetbeng, kaba hangne ruh u Riew Tymmen Riew San, ki la leit sha ka shat ka khein ka khnong ka bishar, ban ia pan hukum na U Blei Trai Kynrad ryngkat na ki ryngkew ki basa.
Ba kumba la buh ia ka sngi ka ia, ba ma ki ruh kin da mih paw ki dak ki shin ban pdiang ia kane ka kiew pyneh ryngiew ba shi sien shi snem u khun bynriew khnang ban ioh ia ka ainguh ka aidem ka dwai ka kyrpad ka kyrpon bad la u Blei Trai Kynrad, ba un theh sei ia ka jingkyrkhu kaba na sha lyndet ka jong u.
Ynda haba la pyndep ia ka nguh ka dem, la kiew tiap sha ka duwan ka dupat ha kaba la sdang ka pynsum ka pynsleh ban pynkyntang ia ka duwan ka dupat, kaba long ka bynta kaba kut jong ka sngi bad pynkhreh pat ia ka jingwan ban ia kiew paidbah pat sa ha ka 4 tarik ha kaba yn pyndep sa ia kawei pat ka lehniam katta ka nguh ka dem lang baroh ha kane ka sngi ba kyntang.
