Shillong, Rymphang 13: Ka myntri ka tnad ka koit ka Khiah ka Dr. Ampareen Lyngdoh kala kynti ia ki long iing long sem baroh ba kin register ia lade bad ka Meghalaya Health Insurance Scheme (MHIS) ba ka bynta ka jingmyntoi jong ki ha ka por ba ki pang shitom.
Kaei kaba jngai mynta ka long kaei kaei kaba sngewsih ban tip ba bun na ki long iing ynda kila poi shitom jur haba u ne ka ba pang la poisha ICU kin sa kylli shaei ka MHIS Kard, ha kumkane ka por kala shitom ban shim ia ka jingpynshon kti.
Shuwa ka katta kim patiaw, dei halor kane ka nongrim bala hap ban pynshai paidbah ban pynsngewthuh ha kaba ia dei bad kane ka jingmyntoi kaba kongsan kaba ki paidbah ki ioh lyngba kane ka MHIS.
Na ka liang jong ka myntri kala pynshlur ia ki paidbah nongshong shnong ba kin register bad ka MHIS, na ka liang jong ka sorkar ka sngewthuh ba kam biang ka Internet, ka sorkar tip ba ki don ki jingeh.
Ka myntri kala ong ba ka jingshisha ka long ba ia kine ki jingeh ka sorkar kala ia kren bad ka sorkar pdeng ha Delhi, haba ai sha u paidbah ia kane ka skhim kaba pynmyntoi ia ki paidbah, hynrei ki don katto katne ki bynta ki bym iahap, ia kine ki jingeh donkam ban ia kren bad ka sorkar pdeng.
Kumba ka long mynta ka jingregister bad ka MHIS ha ka jylla ka dang long tang kumba 78 %, kaei kaba jia ka long ba kiba bun ki briew kim don jingngeit ha ka Aadhaar bad ha MHIS dei tad haduh ba kin da pangjur kin sa wan.
Ka Dr. Ampareen ka la ong ba kala bthah ia ka tnad ka koit ka khiah ban pynlong ia ka jingpynshai paidbah halor kane, hooid ki don ki jingeh ia kaba ki hapban pynbeit hynrei lada register ha ka por ba koit u khiah kan nym don jingeh.
U myntri Rangbah ka jylla u la ia kren ia kane ka jingeh bad ka sorkar pdeng ha Delhi, kumba ka long mynta ka don ka jingbym sngewthuh tnad ka koit ka khiah kala dei ban pynshai paidbah ha kaba ia dei bad kane ka bynta.
