Shillong, Rymphang 19: Ka myntri ka koit ka khiah ka Dr. Mazel Ampareen Lyngdoh haba jubab ia ka jingkylli jong u bah Nujorki Sungoh, ka jubab ka long ba ia mynta kam don kano kano ka jingthmu ban buh ia ka Medical College ha Jaintia Hills.
Na ka liang jong ka myntri ruh kala kdew ia ki katto katne ki kyndon ban buh ia ka Medical College ha kaba kala ong ba don kam ban don ia ka Hospital kaba 220 jingthiah bad ka Medical College ka dei ban ngiam 50 ngut ki samla pule, kaba ym pat lah ban pynurlong ia katei ka jingbuh kyndon.
Ka myntri ka koit ka khiah kala ong ba, kaei kaba ka sorkar kan leh mynta ka long ban thung shuwa ia ki briew sha kito ki PHC bad CHC kiba la dep ban plie, namar ki dang don bun ki CHC bad PHC kiba la dep ban plie kim don nongtrei ia kaba ka sorkar kan pynbiang shuwa ia kine.
Ka myntri kala pyntip hapoh ka iing ka sorkar kala pyrshang baroh ki lat ki lynti ban pynbha ia ki jaka ai jingsumar na ka bynta ka jingbit jingbiang ki paidbah ha ka jylla bad ha Jiantia Hills haba ia dei bad ka Pysiar ka sorkar ka dang bishar bniah.
