Shillong, Lber 01: Ka Central Bureau of Communication (CBC), Tnat Information and Broadcasting, Sorkar India, Regional Office, (MT Region), Shillong ka la pynlong ia ka Photo Exhibition & ka jingai jingtip kaba ar sngi halor ki nongiakhunjinglaitluid jong ka thain shateilammihngi bad ka bam kaba tei ha Ramakrishna Mission Higher Secondary School, Mylliem.
Ha kane ka exhibition la pyni ia ka jingiakhunjinglaitluid jong ka India lyngba ka jingpyni ia ki dur. Ka jingai jingtip ka thmu ruh ban kyntiew ia ka bam kaba tei bad pyni ia ki sienjam jong ka sorkar ban iakhun ia ka jingduna ka bam kaba tei da kaba kyntiew ia ki rukom bam kiba tei.
Ka DHEO, East Khasi Hills, Kong O Summer ha ka jingai jingkren jong ka,ka la batai sani shaphang ka bam tynrai na ka bynta ka jingtei ia ka met, ka jingsan ka jabieng bad ka jingiakhun ia ka jingdunasnam (anaemia).
Ka la ban jur halor ka jingkyntiew ia ki jingtei met bad ka jingbam ia ka bam kaba bha. Ka la ban jur ruh halor ka jingiadei jong ka bam bad ki jingpang bapher bapher bad ka rukom bam kaba dei.
Ka la pynkutia ka jingkren jong ka da kaba pynshlur ia ki khynnah pule ban dih shisien shi taiew ia u dawai Folic Acid bad ia u dawai Albendazolearsien ha ka shi snem khnang ban pynduhjait ia ka jing duna snam.
Ka Kong IcydoraNongrum, Principal jong ka skul ka la pynpaw ka jingsngewnguh jong ka ia ka CBC, Shillong kaba la pynlong ia ka exhibition bad ka ong ba kane kan iarap ban ai jinghikai ia ki briew, bad khamtam ki khynnah pule, shaphang ka jinglenlade kaba khraw jong ki Nongiakhunjinglaitluid na ka bynta ka ri.
Ka la ong shuh shuh ba lyngba ki dur ba la buh ha kane ka exhibition ki khynnah pule ki ioh jingtip shaphang ki riewshlur ki bym shym la paw pyrthei jong ka thain shateilammihngi kiba la nohsynniang sha ka jinglaitluid jong ka ri.
Haba kren shaphang ka bam kaba tei, ka la kyntu ia baroh ki khynnah pule ban pynneh ia ka rukom bam kaba ryntih bad ban pynthikna ba ki bam kumba 5 jait ki bam ha ka shi sngi ba kynthup ia ka carbohydrate, ki protein, ki shanadai, ki jingbam ba shna na ka dud, ki jhurjyrngam.
La pynlong ia ki jingiakop bapher bapher hapdeng ki khynnah pule jong ka skul ha kane ka prokram kaba ar sngi. La sakhi ruh ia ka jingiashim bynta shitrhem ha ka jingiakoprwai, quiz, bad ka jingdrodur. La sam ia ki khusnam sha ki nongjop ha ka jingialang pynkut ba la pynlong mynta ka sngi.
