Shillong, Iaiong 27: Ia ka sngi seng ha ka 27 tarik u Iaiong 2024 ban rakhe ia ka jingdap 123 snem ka jingwanjngoh u Swami Vivekananda ia kanongbah Shillong la pynlong ha ka Ramakrishna Mission Vivekananda Cultural Centre. Khnang ban ai bynta lang ia ki ar hajar ngut ki samla pule, ia kane ka prokram la pynlong ha ki ar bynta, kawei ha ka por mynstep bad kawei pat ha ka por nohphaisngi.
Ia ka bynta kaba mynstep la sdang ha ka por 10:00 baje ha kaba la buh syntiew hakhmat u mot jong u Swami Vivekananda da u kongsan, Harish Chandra Chaudhary, IFS, Principal Chief Conservator of Forests bad Principal Secretary sha u Lat ka Jylla Meghalaya.
U symbud kongsan Swami Vedaswarupanandaji Maharaj, u nongialam na ka Ramakrishna Mission Institute of Culture, Golpark, Kolkata bad u Swami Hitakamananda, Secretary, Ramakrishna Mission, Shillong.
Ban kynmaw burom ia kane ka sng la ai ia ka khusnam Vivekananda Award of Excellence sha ka Dr Anita Panda kaba la noh synniang bha sha ka imlang sahlang kum ka nongthoh bad ka nongkyntiew ia ka deiriti bad la ai ruh kane ka khusnam sha u BabluChanda, u nonghikai ha kane ka jaka pule uba la noh synniang bha sha ka Ramakrishna Mission Vivekananda Cultural Centre. Ki la ioh ia ka citation bad ka buskit song tyngka.
Ka prokram ka la sdang ha ka auditorium lyngba ka jingthang ia ka sharak da ki kynrem ki lyndan bad hadien kane ka la don ka jingai jingkren da u Swami HitakamanandaMaharaj, Secretary Ramakrishna Mission, Shillong, ha kaba u la ban jur halor ki jinghikai jong u Swami Vivekananda shaphang ka niam ha kylleng ka pyrthei bad ka jingpdiang ia ka jingryntih kyrdan jong baroh ki niam kiba ialam lynti lang sha kawei ka thong.
Ha ka jingkren jong u, u symbud kongsan Swami Vedaswarupanandaji, na ka Ramakrishna Mission Institute of Culture Golpark, Kolkata u la ai mynsiem ia ki samla da ki kyntien jong u Swami Vivekananda kiba long kiba khuid bad kiba iahap bha.
U la ong ba baroh ki dei ban pule shaphang u Swami Vivekananda ban ioh mynsiem bad jam shakhmat ha ka jingim. Kiba iawan iashim bynta ki la pdiang ia ki jingkren ai mynsiem bad ki jingai jingmut jong u.
U kongsan, Harish Chandra Chaudhary, Principal Conservator of Forests bad Principal Secretary sha u Lat ka Jylla Meghalaya u la ong ba u burom bha ia u Swami Vivekananda. U la iaroh ruh ia ka bynta jong kaRamkrishna Mission Vivekananda Cultural Centre ha ka jingpyrshang ban ai jingshakri ia ki samla ha ki rukom bapher bapher.
U kongsan ha ka bynta kaba ai Major General Rajesh Kumar Jha, AVSM, Director (Personnel), North Eastern Electric Power Corporation Limited (NEEPCO), ha ka jingai jingkren jong u, u la batai shaphang ki jingshem kiba jynjar ha ka jingim jong u bad kumno u la lah ban jop ia kine bad u la ong ba u sngewnguh bha ia u Swami Vivekananda na ka bynta kane.
U la iathuhia ki khana shaphang u Vivekandndabad u la kyntu ia ki samla ba kin pynkhlain ia ka bor sngewthuh jong ki. U kongsan u la pyllait paidbah ia ka magazine ha ki laijait ki ktien “Ka Jingshai – The Light Jyoti” Volume: 5 Issue:1, e-zine.
Hadien kine ki ar bynta jong ka prokram, la don ki prokram pyni ia ka deiriti jong ka India khamtam na ka thain shateilammihngi. Kumba 1800 ngut ki shah hikai ki la wan iashim bynta ha kane ka prokram.
