Shillong, Jymmang 28: Ka jingwan lynshop ka lyer langthari ka “REMAL” kala ktah jur bha ia ka South West Garo Hills District, ha kaba 21 tylli ki shnong kila shah ktah ha kane ka jinglynshop ka mariang, ha kaba bun ki iing ki sem ki jingtei jong ka sorkar ruh kila shah pynjulor.
Kiba hap hapoh jong ka Betasing C&RD Block, ki shnong kiba la shah ktah ki long san tylli, kita ki long ka shnong Rongsang Songma, Chondonpara, Dalbotpara, Purasinga, bad Betasing Khongpara.
KIba hap hapoh jong ka Rerapara C&RD Block, ki shnong kiba la shah ktah ki long khatar tylli, kine ki kynthup ia ka Balalgre, Chigitchakgre, Jaluapara, Lower Damalgre, Lower Damalgre B, Chengjora, Abiselagre, Balnanggre, Gongglanggre bad Bolganggre.
Kiba hap hapoh jong ka Under Zikzak C&RD Block, ki shnogn kiba la shah ktah ki long lai tylli bad kito ki long ka Chapahati-I, Chapahati-III, bad Kalaipara kala wan rah ia ka jingduh kaba khraw, kaba hap hapoh jong ka Purakhasia B&RD Block, ka shnong kaba la shah ktah dei tang kawei ka.
Baroh ki briew kiba la shah ktah ha kane ka jinglynshopka mariang ki long 377 ngut, ki iing kiba la shah pynjulor ki long lai tylli kiba la jot lut bad 55 tylli kiba la shah pynjot malu mala.
Na ka liang jong ki bor jong ka District kala ialeh ban phah ia ka jingiarap sha baroh kito ki long iing kiba la shah ktah ha ka jingpynjulor ka mariang bad la bthah ia ki BDO ba kin ai ia ka kaiphot kaba pura hapoh lai sngi ia kane ka jingshah pynjulor ha ka mariang.
Kane ka lyer langhthari kala pynjulor ruh ia ka bor ding elektrik bad mynta ka jingmaramot ka dang iaid sha khmat ban pynioh biang ia ka bor ding elektrik sha ki paidbah, na ka liang jong ki bor ba dei peit ia ka District kila trei shitom ban biang ia ki jingdon kam, kane ka kaiphot kam pat dei kaba la jurip bniah.
