Shillong, Jymmang 29: Mynta ka sngi ka ‘Assurance Committee’ ka iing dorbar thawain ka jylla hapoh ka jingialam jong u bah Renikton Lyngdoh Tongkhar, ryngkat bad ki dkhot bah Gabriel Wahlang, MLA, bad u Matthew B Kurbah, MLA, kila leit sha Mawmluh Cherra Cements Limited (MCCL) ha Sohra ban jurip ban lap ia ka jingshisha.
Ha kane ka jingleit ka kommittee kala ia kynduh ia ki ophisar jong katei ka kompeni pynmih dewbilat kaba dei jong ka sorkar, ha kaba ka sorkar jylla kala don ka jingpyrkhat ban khang khyrdepnoh ia kane ka karkhana dewbilat.
Ka kong W.A.M Booth kaba dei ka Managing Director, u General Manager ka MCCL u bah K Lyngdoh bad kiwei ki ophisar jong kane ka karkhana pynmih dewbilat kila ia kynduh lang bad ia shim bynta ha ka jingiakren.
Ha kane ka jingleit jurip ia ka MCCL u bah Renikton L Tongkhar, u la pynpaw ba imat kam don jingkyrmen shuh ban pynimbiang ia kane ka karkhana dewbilat na kiba bun kid aw, kynthup lang ia ka dor ban pynimbiang ia kane ka karkhana.
Ki dkhot jong ka ‘Assurance Committee’ kila ia mynjur ban ai jingmut sha ka sorkar ban pynkylla ia ka kum ka jingbuh nam “Museum” bad ia ki iing sah ban pynkylla ha ki ing basa bad kane kan ailat ia ki nongtrei ba kin pyniaid bad ban pynkylla ia kane ka jaka kum ka jaka jngohkai pyrthei.
“Ngi tip ba ka sorkar ka kwah ban khang noh ia kane ka karkhana dewbilat bade ban pynranoh ia ka, haba peit ka jingitynnad kane ka jaka, ka long kaba sngewsih ban pynpra ia ka” la ong u shongknor ka Assurance Committee u bah Renikton.
U Bah B Kurbah u la ong ba u don ka jingiadei kaba jan bad ka MCCL naduh u snem 1999 haduh 2000 u la pynpaw ia ka jingsngew bynniaw ban ioh ba ka karkhana kan sa shah khang bad u la sngew iahap ia ka jingpynsngew u shongknor. U Bah Gabriel Wahlang u kyrmen ba ka sorkar kan sa ai ia ki jingiarap sha ki nongtrei lada khangdam noh ia kane ka karkhana.
