Shillong, Jymmang 29: Ka KSU hadien ba ka la iohi lyngba ki lad pathai khubor mynta ka sngi ba ka sorkar ka thmu ban phah pyniasoh noh ia baroh ki colleges ka jylla sha ka Williamson Sangma State University, ka pynpaw ia ka jingsngew kyndit namar ka sorkar ka khlem iathuh eiei hato ka la dep ia syllok ne em bad ki nongpyniaid Kolej.
Ha ka juh ka pork am pat don ka jingiasyllok bad samla pule colleges ka jylla halor kane ka rai. Kane ka rai ka dei kaba ktah ia ka im ka iap ki samla pule bad donkam ia ka sorkar ban ia syllok shwa bad baroh ki riewpaidbah khamtam ki nongpyniaid college, ki nonghikai, ki kpa ki kmie, ki samla pule bad ki seng bapher bapher ha shwa ban shim ia kum kane ka rai.
Ka sor Shillong ka dei ka nongbah jong ka jylla bad ka KSU ka sngew ba ki bor ba dei khmih bad pyniaid ia ka pule puthi ki dei ban don ha Shillong ban pynsuk ia baroh lang. Ka KSU ka pynkynmaw ia ka jingjia ha u snem 2005 ha kaba ka la don ka jinghuri hura kum ka jinglait tuh ki kot jingkylli.
Ka jingbym poi ki kot jingkylli ha ki jaka thoh eksamin kaba pynlong ia ka seng ban dawa regional administrative office jong ka MBOSE ha Shillong kaba la poi haduh u pud jong ka jingiakyad kaba jur ha kaba da ki phew ngut ki samla Khasi kynthup ia ki dkhot ka KSU ki la shah kem bad mynsaw jur ha ki jingiakhih.
Ka jingwan jong ka Regional Office ka MBOSE ha Shillong ba khlieh da u Executive Director ka la iarap shibun ia ki samla ba pule ha ki colleges bapher bapher. Kyntang ia wai ka KSU ka pynsngew ba kumba 70% ki colleges ki don ha ka thain Mihngi jong ka jylla.
Ka seng KSU kam sngew iahap ban iasoh bad ka University kaba don sha kawei pat ka thain kaba jngai na ka nongbah bad ka sorkar kan hap pynshai paidbah bha haba ka shim kum kine ki rai ban lait na ka MBOSE 2.0. katkum ka kyrwoh kaba la phah da ka KSU.
