Shillong, Jylliew 08: Mar ia ioh ia ka jingleit luid ka Ri India na ka kti jong ka ri Bilat ha ka15 Nailar 1947, u Jawaharlal Nehru u la shimti ia ka kam Myntri Rangbah Duh jong ka Ri India katba ym pat ioh ia ka elekshon sha ka iing dorbar jong ka Lok Sabha jong ka Ri India bad ka elekshon kaba nyngkong dei ha u snem 1951.
Ha ka elekshon kaba nyngkong hapoh ka Ri India la pynlong naduh ka 25 Risaw 1951 bad la pyndep ha ka 21 Rymphang 1952, kaba ar ha u snem 1957 bad kaba lai ha u snem 1962, kaba u Jawaharlal Nehru bam kwai ha dwar u blei u la ioh bam smai lai sien lynter kum u myntri Rangbah Duh jong ka Ri India.
Ha dien ka snem 1962 ym pat don balah ban pynkhein ia katei kaba la bat da u myntri rangbah duh ba rim jong ka Ri India ba dei na ka seng Indian National Congress, dei ha kane ka kynti kaba mynta ba u Narendra Modi na ka BJP ban sa shim ia kane ka jingbam smai lai sien lynter kum u myntri Rangbah duh jong ka Ri India.
Ha ka General Election sha Lok Sabha ka party BJP kala jop ia ka jingbun paid ha kaba u Narendra Modi na ka party BJP u la shah jied kum u myntri rangbah duh jong ka Ri India, ha u snem 2014, ha u snem 2019 bad mynta ka snem 2024.
Ha ka Ri India naduh u myntri rangbah duh ba nyngkong u Jawaharlal Nehru bala shimti ia kane ka kam ha u snem 1947 haduh mynta snem 2024 sha ka iing dorbar Lok Sabha kaba 18 u Narendra Modi baroh kila myntri rangbah duh kila don 15 ngut.
