Shillong, Jylliew 10: U Chief Executive Officer jong ka Shillong Municipal Board u la pyntip ba ka ophis kala ioh ia ka jingtip ba ki briew kiba ym lah ban tip kila khrong pisa da ki resit kiba thok ha ka kyrteng jong ka Shillong Municipal Board.
Kane ka jinglum pisa ka long na ki nongdie madan ha ka kyrteng ban register ia ki nongdie madan bad ka Town Vending Committee (TVC) bad ka ophis jong ka SMB kaba dang pynlong ia ka jingjurip katkum ka ain Meghalaya Street Vending (Protection of Livelihood and Regulation of Street Vending) Scheme, 2023.
Na ka liang jong u CEO ka SMB la pyntip ba kam don kano kano ka jingphah pisa ban pynrung kyrteng bad ka TVC. Ka ophis kala ioh ruh ia ka jingujor halor kane ka jingkhrong pisa beain na ka seng Meghalaya & Greater Shillong Progressive Hawkers & Street Vendors Association (MGSPHSVA).
Haba ia dei bad kane u CEO jong ka Shillong Muncipal Board u la ujor ia ka ejahar ha ka ophis jong u Superintendent ki Pulit jong ka East Khasi Hills District, Shillong ha kaba u la ban jur ba dei ban kem ia kiba don kti bad pynshitom katkum ki kyndon ain.
