Shillong, Jylliew 18: Ki pulit jong ka Ri Bhoi mynta ka sngi kila ioh ia ka jingtip na ki nongniah trok ba ki don ki nonglute na ki trok ha ka surok bah Shillong-Guwahati, kumta ki pulit kila pynlong ia ka jingpynap ha surok bah ha jan Saiden.
Kine ki nonglute kila ialeh ban lute ia ki trok ha surok bah bad kane ka la jia ha ka por kumba 4.30 baje noh phai sngi, kane ka jinglute ka long ha Umtrew jong ka Ri Bhoi District bad kine ki nonglute kila wan da ka kali Scorpio kaba khlem don number.
Haba la ioh ia kane ka jingtip la phah jingtip sha Umiam Police Station, Umsning, ba la ong ba kine ki briew kila pyrshang ban rah bor ia u wei na ki nongniah trok ba don ia ka number JH02AK9061 kaba mut an leit sha Guwahati,
Haba ki pulit kila pynsangeh ia kane ka kali ha por 6.01 baje ha Saiden, kane ka kali kala phet bad tynrah ia ka Naka jong ki pulit da ka jignthmu ban pyniaid briew, ki pulit kila beh ia kane ka kali bad da poi ha Nongpoh kila hap ban siat ban ioh kem ia kine ki briew.
Da poi ha jan ka iing Kashari jong ka Ri Bhoi ki pulit kila ioh ban kem ia kine ki saw ngut kiba la pyrshang ban phet, ha ka jingtohkit kila phla ba ki mut ban rah bor ia u nongniah ka trok JK02AK9061 ba kyrteng u Prem Chand Kumar Mali.
Da kane ka jingioh kem ki pulit ia kitei ki saw ngut ki nonglut la ioh ban pynlait ia u tei u nongniah trok, ki saw ngut kiba la shah kem ki long u Pradip Gogoi 38 snem, u Tulan Phukan 36 snem, u Pranjal Gogoi 38 snem bad u Deep Das 28 snem, kine baroh na Assam.
