Shillong, Jylliew 24: Mynta ka sngi ka ophis jong ka Shillong Municipal Board kala ioh ia ka dur jong u briew ba shah kynnoh ba u la lam pisa na ki shnong shong madan ha kane ka nongbah Shillong bad kum juh ia ka slip kaba ki nongshong madan kila siew T.250/- tyngka, kane ka long katkum ka kyrwoh kaba la phah na ka ophis ka SMB.
Katkum ka kyrwoh na ka ophis jong ka SMB kala ong ba ka slip kaba kila ioh ka dei kaba la shu shna thok bad ia ka dur jong u briew ba la shah kynnoh ba la khrong pisa bad ia ka slip la ioh na ka WhatsApp group bad na ka ophis jong ka SMB kala kren shai ba ka slip ka dei kaba shu thok.
Ban kynmaw ba u Chief Executive Officer jong ka SMB u la ujor ia ka ejahar bad ka ophis jong u Superintendent ki Pulit jong ka East Khasi Hills District ba kila don ki briew kiba la lum pisa ha ka kyrteng jong ka SMB ban register ia ki nongdie madan hapoh jong ka Town Vending Committee (TVC) katkum ka Meghalaya Street Vending (Protection of Livelihood and Regulation of Street Vending) Scheme, 2023.
Na ka liang jong u CEO jong ka SMB u la pynshai ka ba ophis kam shym lum pisa ne shim pisa bad kam don ruh kum kata ka ban hap register bad ban phah siew ia ka pisa, kaei kaba ka ophis ka leh ka long ba ki khlem shim pisa baroh kaba ki leh la pyneh ei khlem don kam jingsiew.
