Shillong,Jylliew 25: Ka jingkhynra bar jylla ka tnad Anti-Infiltration jong ka Police Department ka long kaba donkam na ka por sha ka por bad ka KSU ka kyntu ia kane ka tnad ba kan iai bteng ha baroh ki dong ki thaiñ jong ka jylla.
Ka jingkhynra bar jylla ka dei ban iaid ruh ryngkat bad ka jingiatreilang bad ki Dorbar Shnong bapher bapher khnang ba yn lah ban teh lakam kham bha ia ka jingwan rung kyrthep ki bar jylla namar kane ka mat ka dei kaba ktah shikatdei eh ia ka jinglong trai ki Khasi ha la ka khyndew ka shyiap bad ruh wat ia ka jingneh jingsah u paid Khasi ha la ka Bri U Hynñiewtrep.
Ka KSU ka hap ai jingiaroh ia ka tnad Anti-Infiltration kaba la khynra ia ki bar jylla mynne ka sngi ka 24 tarik u Jylliew 2024 hapoh shnong Nongmensong bad Mawpat katkum ba la paw ha ki lad pathai khubor.
Tangba ka KSU ka pynpaw ia ka jingbym sngewhun namar ki pulit kane ka tnad ki pan tang ia ki EPIC, Adhaar bad Labour License hynrei ki klet pat ia ka Work Permit kaba dei kawei ka kot kaba kongsan tam ban ioh buddien ia ki bar jylla ba wan trei sha Meghalaya.
Kane ka kot katkum ka Inter-State Migrant Workmen Act (Amendment) 2011 ym tang ba ka pyni ia ka jaka sah lane shnong trai ki bar jylla hynrei ka pyni ruh ia ka jinglong kine ki briew kiba wan nabar la kidei riew bymman ne kiba la ju don dak bad ka aiñ.
Shuh shuh kane ka aiñ ka khanglad ia kine ki bar jylla ba wan trei wan ktah ban ioh long trai shnong ha ka jylla namar kin hap pynthymmai ia la ka Work Permit man la ka 179 sngi. Ka jingkhynra bar jylla khlem da dawa ia ka Work Permit ka long kaba dkoh haduh katta katta namar kane ka aiñ ka pyrkhing ia ka jingthmu shong shnong ki bar jylla.
Kumta ka seng ka kyntu ia kane ka tnad pulit ba nangne sha khmat ka dei ban pan ia ka Work Permit na baroh ki bar jylla bad ki contractor jong ki bad lada kim don dei ban pynphai biang ia ki na ka jaka ba ki wan lane pynshitom katkum ki kyndon aiñ. Shuh shuh, ka Work Permit ka dei ka aiñ ba pura ka jylla kumta dei ban pyntreikam bniah bha ia ka ha ki jingkhynra bar jylla.
Ha kawei pat ka mat kaba ia bnoh lang bad ka jingrung kyrthep ki mynder ka KSU ka buh jingkylli biang ia ka sorkar shaei ka Meghalaya Residents Safety & Security Act (MRSSA) 2016 ka jah rngai? Kaei kaba pynsah teng ia ka sorkar ban pyntreikam ia ka haba ka sorkar pdeng lyngba ka Ministry of Home Affairs (MHA) ka la pynphai biang ia kane ka aiñ sha ka sorkar jylla.
Ka KSU kan sa wad jingtip halor kane ka mat na ki bor sorkar ban kan sa shim ia ki rai ban pynbor treikam ia kane ka aiñ. Kyntang ia wai ka KSU ka pynkynmaw biang ia ka sorkar MDA ioh lehse ka klet, ba kan leit tynruh kham tyngeh sha ka sorkar NDA halor ki mat ba kongsan kum ka ILP, ka ktien Khasi ban rung ha 8th Schedule bad kiwei kiwei. Kane ka long katkum ka kyrwoh kaba la phah da u samla Donal V Thabah General Secretary ka KSU.
