Shillong, Naitung 05: Ka KSU East Jaiñtia Hills District unit ka kyntu ia ka sorkar jylla ban pynsted ia ka jingpyntrei ia ka surok NH 6 ban suk ka leit ka wan ki paidbah. Ka jingiakhih jong ki paidbah hapoh ka jingialam KSU ha kane ka snem ba la leit 2023 la ar sien bad ka jingiakhih paidbah.
Ki paidbah jong ka Dong Namchiang Elaka Narpuh la ar sien, ka jingkwah bad jingdawa ka long ban ioh ia ka surok ba bha bad ruh khnang ba ka jylla kan lait na ka jingjah burom bad jinglehraiñ ha khmat kiwei pat ki jylla ba marjan jong ka thaiñ NE.
Ki paidbah nalor ba ki la dep jied ia ki nongmih khmat pynban ki hap bapli ban mih sha surok ban ong ngi dawa ia ka hok. Ka jingiaroh bad jingsngewnguh ka leit sha ki paidbah ba pynlong jingiakhih.
Ka seng ka kyntu ia ka sorkar ban pyntrei hok ia ka pisa ba la mang na bynta kane ka surok bah. Ka pisa ka wan nangno nangno ngim tip, hynrei ngi kwah ia ka surok ba bha.
Ka seng ka kyntu ruh ia ka sorkar kum ka jingai jingmut ban leh ia ka jingmaramot ba kyrkieh ne ka emergency repair ia ki katto katne tylli ki jingkieng kiba la jan twa bad dkut noh ym tip ha kano ka por.
La ima shisha ban peit bad ban iaid lyngba ia kine ki jingkieng. Kum ka jingai jingmut ban pyllut khyndiat ka pisa ban repair da ka cement ban dung da ka slap ha kito ki bynta ba la palat ka jingjot. Lada lah ban leh kumta tang ha kine ki bnai lyiur te kan iada shibun ia ka leit ka wan ki paidbah.
