Shillong, Naitung 07: Ka Na Rympei FC ka la ïoh ban rah namlahduh ha ka lympung ïalehkai 1st Hynniewtrep U-16 Football League bala pynlong daka Hynniewtrep Youths'(HYC) Council Central Body Sports Cell. Kane ka la wan hadien ba ka la lah ban pynliem noh ïa ka Tanaw FC lyngba ka tie breaker.
Haba phaidien, ka HYC Central Body Sports Cell ka la plie pyrda ïa kane ka lympung naduh ka 20 tarik jong u ïaïong, 2024 ïa kaba la pynhap pyrda noh hynne ka Sngi Saitjaiñ ha madan Malki, Shillong.
Ka jingpynlong ïa kane ka lympung ka long shi bynta ban rakhe ïa u mawmer ba kynjoh 10 snem ka jingïaid lynti jong ka seng ryngkat ka thong ban kyntiew ïa ki khynnah samla kiba don ïa ka sap ha ka phutbol.
Ka jingïalehkai ka la long kaba itynnat bad baroh arliang ki la sei lut ïa ki sap ki phong ban ïoh pynkhihjar. Ka Tanaw FC ka la lamkhmat nyngkong ïa ka jingïalehkai lyngba ka kol shuwa ban kut ka kylla step hynrei ka Na Rympei ka la ïoh pynïalkhaid noh ha ka kylla miet ban pynïaryngkat ïa ka kol da mar kawei ban jam sha ka extra time.
Wat hadien ba ladep ïaid ka extra time ym shym la don ba lah ban pynïakhlad ïa ka jingïakhaid hapdeng kine ki arliang mamla kaba la pynlong ïa ka rai nongjop ban jam sha ka tie breaker.
Ha ka jingshut ïa ka tie breaker ka Na Rympei FC ka la lah ban thep baroh katba ka Tanaw FC ka la shah khanglad noh kawei ha u rangapkol ka liang pyrshah kaba la pynlong ïa ka kynhun ban shah rem noh ha kane ka jingïakhun final.
Da kane ka namjop ka Na Rympei FC ka la ïoh ban khur ïa ka song khusnam kaba haduh 60,000 tyngka ryngkat bad ka trophy, katba ka Tanaw FC 30000 tyngka ryngkat bad ka trophy.
Nalor ki khusnam kynhun la ïoh ruh ban sam khusnam rangïalehkai ba kynsai, ha kaba ïa ka nam Best Goal keeper la khur da u Wallamjingsuk Khongshun jong ka Tanaw FC, u Bankit Mujai jong ka Nangïaikiew u la khur ïa ka nam Top Scorer, bad ïa ka nam Best Player Player la khur da u Fabrizio Majaw jong ka Tanaw FC.
Ha kane ka Sngi la ïadon ryngkatlang u President Rangbah ka Seng – u Roykupar Synrem u la long kum u Kongsan, katba u Bah Donbok Kharlyngdoh (vice president hyc sengkmie) kum u symbud kongsan, ki dkhot nongkitkam ka Sports Cell bad kiwei kiwei.
Nalor kane, ka seng ka la ïoh ruh ban pynkupburom ïa u Niawki Iakai bad ïa u Banteilang Jyrwa kiba la wanrah nam ïa ka jaidbynriew da kaba tyngshaiñ bad seisoh ha ki jingïalehkai kiba maki ki mihkhmat.
