Shillong, Naitung 08: Ka Delimitation Committee jong ka Khasi Hills Autonomous District Council (KHADC) ia ka ba la thung ha u bnai Risaw 2023 mynta ka sngi ka 8 tarik u Naitung 2024 ka la aiti noh ia ka kaiphot ha u deputy CEM ka KHADC u bah Pynshngain N Syiem.
Ia kane ka kaiphot ba la aiti da ka delimitation Commtte ia ka ba la khlieh da u Bah Strawell Kharsyiemlieh u ba dei u nongbishar ba la shongthait jong ka District Council Court kum u Chairman ha ryngkat ka jingiadon lang ki dkhot ka Committee.
Ha ba ioh ban iakren bad u bha PN Syiem Deputy CEM KHADC u la ong ba ka Executive Committee jong ka KHADC kan sa ioh ban ia shong ban ia thir halor kane ka Report bad nangta pat yn sa rah ia kane ka report sha ka dorbar Lyiur.
U bah PN Syiem u la ong ruh ba na ka liang ka EC kan ioh ban ia shong iathir ia kane ka report lashai ka sngi bad kan shong ha ka EC la ka kwah ne em ban wanrah ha ka iing dorbar ne kan leh da kiwei pat ki sienjam. U la ong ruh ba lada ka EC ka iahap jingmut lang na ka liang ka EC kan sa rah ia kane ka Report ha kane ka dorbar Lyiur ka ban sa long mynta.
U la ongruh ba na ka liang ka Delimitation Committee ka la dep ban pyndep ia la ka jong ka kamram ha ka ba ki la dep ban ioh ia ki jingai jingmut na ki ba bun ba lang bad na ka liang jong u, u kyrmen ba ka committee kan kynthup ia ki ha poh ka report kumba ka long.
U bah Syiem u la ong ruh ba lada ka iing ka mynjur bad ruh na ka liang ka EC ka mynjur iakne ka Report bala wanrah da ka Delimitation Committee kan don jingeh ia ka Council ban phah sha u Governor lyngba ka DCA bad kan ym shimpor ban ioh ia ka jingmynjur.
Ha ba ioh ban ia kren bad u Chairman jong ka Delimitation Committee u bah Starwell Kharsyiemlieh u la ong ba na ka liang ka Committee ka la lah ban pyndep ia ka jingpynsngew paidbah bad ha dien ki la dep ban ioh ban iashong na ka liang ka Committee ban ia pyrkhat ia ki kam ba ki dei ban leh bad ki la phah ia ki jingai jingmut sha ka EC. U la ong ruh ba na ka liang ka committee kam pat lah ban kren eiei halor ka report bad ia ki jingtip ba bniah lah ban ioh tang na ka EC.
U bah Kharsyiemlieh u la ong ruh ba bun na ki paidbah ki ba la wan ban pynsngew sha ka Committee ka long ba ki kwah ban ioh sha ki constituency ki ba ki kham shuk bad kham jan ia ki.
U la ong ruh ba ki don ki don ki constituency ki ba ki paidbah ki hap ban iaid lyngba na kiwei pat ki constituency hynrei na ka liang ka committee ka kamram ka long tang ban peit bniah ia ka jingbunpaid. U la ong ruh ba na ka liang ka committee ka laleh ia ka ba bha tam.
