Shillong, Naitung 10: U Chief Executive Member jong ka KHADC u bah Pyniaid Sing Syiem haba jubab ia ka jingkylli u nongialam ka liang pyrshah u bah T.W Chyne la iathuh ba baroh ki nongtrei ki don 810 ngut.
Ka jingdon ki nongtrei katkum ki District ki long ba ha East Khasi Hills District ki don 765 ngut, West Khasi Hills ki don 13 ngut, South West Khasi Hills ki don 16 ngut, Ri Bhoi District ki ki don 16 ngut.
Kiba trei hapoh ka Executive ki don 630 ngut, hapoh ka Legislative ki don 74 ngut, iing bisahr ki don 61 ngut, la ong ba ka jingioh ban pyntrei kam ia ka ain bat khyndew la don kam ban pynkhlain shuh shuh ia kane ka tnad trei kam, bad kum juh ia ka tnad ban shana iing.
La ong ia mynta kane ka jingpyntrei kam ia ka ain shna iing da ka KHADC ka dangdei tang hapoh jong ki jaka kiba hap hapoh ka Master plan bala pynkhreh da ka sorkar, hynrei mano ban tip ba ioh leh se ha ki por ban sa wan kan long shabar jong ka Master Plan ruh.
Ka KHADC ka don ka jingthmu ba ki paidbah haba ki don kam ia ki syrnot ba ia dei bad ka jingioh jingithuh ia ki jaka ki paidbah ki dei ban ioh ia ka jingshari hapoh ki District kaba ki don, bad kum juh ruh lada ka ain shna iing ka treikam ki paidbah kidei ban ioh ha ki District.
Da ka jingioh ia ka District kaba thymmai ka Eastern West Khasi Hills District, ka KHADC kala pyrkhat ban shna ia ka ophis ha Mairang, u CEM la iathuh hapoh ka iing dorbar ba lada don ba tywa ei ia ka jaka 10000 phut sawdong, hynrei kila pan ban ai kam u wei na ka iing.
Kumba ka long ka EC kan shong jingialang bad ban shim ia ka rai haba ia dei bad kane ka bynta ban ioh shna noh ia ka ophis trei kam jong ka KHADC ha kane kaDistrict kaba thymmai.
