Shillong, Naitung 15: Ka Hynñiewtrep Youth Council (HYC) ha ka jingialam u President u bah Roykupar Synrem mynta ka sngi ka 15 tarik u Naitung 2024 ki la leit ban pan jingshai na ka Medical Superintendent jong ka Ganesh Das Hospital hadien ba la kynnoh ba la shim dor palat na ka bynta ban ïoh jingsumar ha Natal Intensive Care Unit kaba thymmai.
Haba ioh ban ia kren bad ki nongthoh khubor na ka liang u president ka HYC u bah Roykupar Synrem u la ong ba ka kynhun jong ka HYC ka la iakynduh ia u Medical Superintendent jong katei ka Hospital hadien ba la ioh ia ka jingujor.
Kane ka jingujor na ki katto katne ki liang halor ka dor kaba heh palat ba la shim na ka bynta ban ioh ia ka jingsumar ha ka jaka sumar ba la kha khun. Na ka liang jong ka internal management committee jong katei ka jaka sumar ka la buh pisa 1500 tyngka shisngi na ka bynta kum kane ka jingsumar.
U la ong ruh ba ngi la pan jingshai halor ka rai jong ka komiti ban wanrah ïa kane ka jingpynbna. Ha kane, u nongpeit ïa ka koit ka khiah u la pynshai ba ïa ka dor la buh na ka bynta ka jingtreikam kaba suk jong ka jaka sumar ïa ki khunlung kiba don 40 jingthiah.
U la pyntip ruh haba kylli hato ki nongpang ki lah ne em ban dawa bai lutksan na ka MHIS, u medical superintendent u la pynpaw ba ki nongpang kiba shah ktah hapoh ka MHIS kin ym hap ban siew ei ei na ka bynta kum kane ka jingsumar.
Da kaba peit ba bun ki briew kim don ïa ka MHIS card bad kito kiba don Ia ka MHIS cards ki bym pat pyniasoh bad u Aadhaar, u MS u la pynshai ba lada kum kine ki briew ki shah sumar ha Hospital, ki lah ban pynrung kyrteng ha ka cell jong ka MHIS, kaban iarap ruh ban pyniasoh ia ka MHIS bad u Aadhaar bad ka jingsumar ruh kan long kaba laitluid.
U bah Synrem u la ong ruh ba na ka bynta kito ki bym don ïa ka MHIS card, ka Hospital ka lah ban ïarap ïa ki lada ki ai ïa ka BPL Card ne ration card ban pyni ba ki wan na ka kynhun ba duna ha ka ïoh ka kot.
Ka ban pynthikna ba ka jingsumar kan long kaba khlem jinglut, bad na bynta Kito ki bym don BPL card, ki lah ban wanrah da ka certificate ba la ai da ki Rangbah shnong ne ki nongialm Shnong ban pyni ba ki dei na ka kynhun ba duna ka ïoh ka kot.
