Shillong, Naitung 16: U bah Sanbor Shullai MLA jong ka 19-Shillong South mynta ka sngi u la ai jingiarap ia ka kong Kmoin Whalang 76 snem shilak tyngka kaba la shah jied ban leit ban ia shim bynta ha ka jingiamaren sha ka ri Australia ban mih khmat ia ka Ri India.
La jied ia ka kong Wahlang da ka Indian athletics team ban leit ban ia shim bynta ha ka 13th Pan Pacific Masters Games 2024 ban long ha Australia naduh ka 1 haduh 10 tarik Naiwieng 2024. Kane ka long ka burom ia ka jylla ba kala shah jied ban mih khmat ia ka Ri na ka jaidbynriew jong ngi.
U Bah Sanbor u la ong ba ka jinglut ban leit sha Australia kan long palat ia ka lai lak tyngka, u la kyrpad ia baroh kiba don mynsiem ban ai jingkyrshan lem ia ka kong Wahlang na ka bynta kane ka jinglut, ka kong Wahlang ka mih khmat ia ka Ri India, ka jylla ia ka jaidbynriew bad ka kur ka jaid.
La ong ba ia ka kong Wahlang yn synran lang da u ophisar ka tnad ialehkai ka South West Khasi Hills District u bah Beningstar Wanniang, ba dei ruh u nonghikai jong ka kong Wahlang ban leit ia shim bynta ha katei ka jingialehkai.
La iathuh ba ha dien ba la sah jied mynta ka taiew ka kong Wahlang ka hap ban pynthikna ba kan leit ban ia shim bynta ha kane ka jingiamareh kane ka jingiarap ka long kaba don kam haduh katta katta namar hap ban register.
U Bah sanbor u la ong ba yn sa ia kren bad ka sorkar MDA ba kan ai ka jingkyrshan ia kane ka kong Wahlang namar ka dei kaba wan na ka long iing kaba duk, hynrei kane ka dei ka burom ia ka jylla ba na ka jaidbynriew khasi ynsa shah jied ban ia shim bynta ha katei ka jingialehkai.
