Shillong, Naitung 27: U Myntri ka tnad Ports, Shipping & Waterways, Sarbananda Sonowal u la iashim bynta ha ka jingiakren shaphang ka mang tyngka 2024 jong ka sorkar pdeng ha kaba u la iakren hangne bad kito kiba trei ha ki kam khaii pateng, ki samla bad ki longkmie na ka thain mynta ka sngi.
Ka jingiakren ka la long shaphang ka mang tyngka 2024 jong ka Sorkar Pdeng ka ban buh ia ka rukom treikam ban pynurlong ia ka ‘Viksit Bharat’. Ka thain shatei lammihngi jong ka India, kaba don ka bynta kaba khraw,
kan ioh jingmyntoi bha na kane ka mang tyngka namar ka thmu ban aibor ia ka ioh ka kot, ki kam khaii pateng bad ki kam rep ha ka thain bad ruh ka jingplie lad ia ki samla, ki longkmie bad ki riewlum, la ong u Sarbananda Sonowal.
Haba ai jingkren ha ka jingialang halor ka jingpynkupbor ia ki jaitbynriew riewlum, u Myntri Sorkar Pdeng, Sarbananda Sonowal u la ong, “Ka Mang Tyngka jong ka sorkar pdeng, 2024 ka pynkhreh ia ka India sha ka lynti ban long ka Viksit Bharat.
Da ka bor bad ka jingphaikhmat ba thymmai, ka mang tyngka ka thmu ban kyntiew ia ka ioh ka kot, ki kam karkhana bad ki kam rep da ka jingtbit ki samla, ki longkmie & ki jaitbynriew riewlum jong ka thain shatei lammihngi.
U Myntri Rangbah duh jong ngi, Narendra Modi ji u la ithuh ia ka thain shatei lammihngi jong ngi kum ka ‘Astalakshmi’ bad ka kor ba thymmai jong ka jingkiew shaphrang ka India.
Hapoh ka jingialam u Modi ji, ka bynta ha kane ka mang tyngka na ka bynta ka jingpynkupbor bad jingplie lad ia ki jaitbynriew riewlum ka la kiew jan 200% lyngba ka jingmang tyngka T. 13,000 klur ka ban pyndonkam na ka bynta ka bha ka miat jong ki jaitbynriew riewlum.
Na ka bynta ka jingplie lad ia ki nongshna tiar ha ki rukom tynrai, ki Self Help Group (SHG), ki Scheduled Caste, Scheduled Tribe bad ki longkmie kiba seng kam lajong, ki skhim kum ka PM Vishwakarma, PM SVANidhji, National Livelihood Mission, bad Stand Up India, ka mang tyngka ka la kyntiew ia ka jingbuh pisa na ka bynta jong ki.
Da kawei pat ka skhim ba kyrpang na ka bynta ka jingioh ia ka hok ha ka imlang sahlang ia ki jaitbynriew riewlum, la pynbna ia ka Pradhan Mantri Janjatiya Unnat Gram ha kane ka mang tyngka kaba thmu ban kyntiew ia ka jinglong ka ioh ka kot bad ka imlang sahlang jong ki jaitbynriew riewlum. Kane kan ai jingmyntoi ia 5 klur ngut ki riewlum ha 63,000 tylli ki shnong.
Haba kren shaphang ka jingkiew ka jingmang tyngka ha ki kam rep ha ka thain shatei lammihngi, u Myntri Sorkar Pdeng, Sarbananda Sonowal u la ong, “Hapoh ka jingialam jong u Myntri Rangbah duh Narendra Modi ji, ngi trei na ka bynta ka jingpynurlong ia ki lad kiba don ha ka thain shatei lammihngi kum ka jaka pdeng jong ka rukom rep tynrai bad Horticulture kumjuh ruh ka jingiarap ia ki samla ba donsap jong ngi ban long ki briew ba la tbit ha ka kam.
Ka jingpyllait ia ki 109 jait ki symbai jong 32 jait ki jingthung horticulture ka plie lad ia ka jylla Meghalaya, kaba lamkhmat ha ka bynta, ban plie ki lad kamai kajih bad pynduna ka jingktah na ka jingkylla ka suinbneng. Lyngba ka digital crop survey ba la tyrwa, ka jingioh ram kan kham suk lyngba ki Kisan Credit Card.
Ka jingmang tyngka kaba T. 598 klur na ka bynta ka projek ba iadei bad ki kam rep ba iaineh kan tehlakam ia ki jingktah ka jingkylla ka suin bneng, ka jingtwa khyndew bad ki jingbam khniang ia ki mar rep bad kine baroh ki kyntiew bha ia ki lad ki lynti kiba don ha ki kam rep ha ka thain.
U Sarbananda Sonowal u la ong shuh shuh, “Ka mang tyngka ka thmu ruh ban kyntiew ia ki kam shna tiar bad ki kam ai jingshakri, khamtam lyngba ka skhim MUDRA kaba ai lad shim ram ia ki MSME. Kane kan pynkupbor ia ka jingseng kam lajong bad kan plie ruh shibun ki lad ioh kam.
Ka dei namar ka jingthmu jong u Myntri Rangbah Duh Narendra Modi ba ka skhim Credit Guarantee ba thymmai kan ai jingkyrshan ruh ia ki MSME ban kyntiew ia ka bor treikam jong ki bad wanrah ia ka jingkiew shaphrang ki karkhana ha ka thain.
Ka Direct Benefit Transfer (DBT), ka sienjam ba kyrpang jong ka Sorkar Modi ka tyrwa T 15,000 ha lai tylli ki bynta ia kito kiba dang shu ioh kam bad ia kane yn pyniasoh bad ka Meghalaya Industrial bad Investment Promotion Policy.
Kane kan kyntiew ia ki karkhana bad ka jingplie lad ioh kam ha ka jylla. Ban plie ia ka bor jong ki samla, yn kyntiew ia 1000 tylli ki ITI bad yn tei ia ki hostel jong ki kynthei, ki jaka ban sumar ia ki khynnah bad kane kan plie lad ia ki longkmie ba kin trei ha ki karkhana.”
Ka mang tyngka 2024 jong ka Sorkar Pdeng ka la buh pisa ruh ban kyntiew ia ki jingdon jingem lyngba ka Phase IV jong ka Pradhan Mantri Gram Sadak Yojana ban pynbiang ia ki lad ka leit ka wan bal ah ban pyndonkam baroh shi snem ha ki jaka ba kham kyndong ba kynthup ruh ia ka thain shatei lammihngi.
Ka PMGSY ka la pyniasoh lypa 3,482 km ki surok ha kylleng ka Meghalaya ha kaba ka jinglut jingsep ka long T 2310.76 klur naduh u snem 2014. Ka mang tyngka ka la buh T 2.66 lak klur na ka bynta ka jingkyntiew ia ki jaka nongkyndong ba kynthup ia ki jingdon jingem ha ki jaka nongkyndong ha ka thain shatei lammihngi.
Ka jingbuh sa T 19,338 klur ha ka mang tyngka jong ka Sorkar Pdeng ban kyntiew ia ki surok bad ki surok bah ha ka thain shatei lammihngi kan kyntiew ia ki jingdon jingem kaba iadei bad ki kam jngoh kai ha ka thain ba kynthup ruh ia ka Meghalaya.
Ha kane ka jingialang, la wan iashim bynta ruh da u Bah Alexander Hek, Myntri ka Tnad Animal Husbandry, jong ka Sorkar Meghalaya, Bah Sanbor Shullai, MLA & Chairman, Meghalaya Tourism Development Corporation (MTDC); Rikman G Momin, President, BJP (Meghalaya) & PS Shukla, Vice Chancellor, Northeastern Hill University (NEHU).
