Shillong, Nailar 05: Ha dien ka jingkylla ka sain pyrthei ha Bangladesh,kaba la pynlong ia ka myntri rangbah duh jong ka ri ka Sheikh Hasina ban hiar shuki bad phet noh na katei ka ri sha, ban iada na kino kino ki jingjia ha khappud ka sorkar Meghalaya kala pynjari ia ka korphiew 200 meter na khappud sha poh ka ri ha baroh shilynter ka jylla ha khappud bad ka Bangladesh.
U Myntri kam poh iing ka jylla u bah Prestone Tynsong mynta ka jan miet la khot ia ka jingialang kaba kyrkieh ia ki heh sorkar naduh u Chief Secretary ha kaba la don lang u IG ki BSF bad ha kane ka jingialang la shim ia ka rai ban pynjari ia ka korphiew naduh 6 baje jan miet naduh mynta ka sngi haduh ka por 5 baje mynstep ha baroh shilynter ka khappud bad ka Bangladesh.
Haba kren ha ki lat pathai khubor ha dien ka jingialang la ong ba ka sorkar pdeng kala phah sa khyndai tylli ki battalion ka kynhun shipai BSF sha khappud ka jylla Meghalaya nalor katta kala phah shuh ruh ia kiwei ki kynhun pahara ha kane ka jylla ban iada ia ki khappud bad ka Bangladesh.
U myntri kam poh iing ka jylla la ong ba ia mynta ym lah ban tip aiu kan jia ha katei ka ri, namar ka jylla Meghalaya ka ia khap bad katei ka ri la shim ia kane ka lat ban iada ia ka jylla Meghalaya bad kum juh ia ka Ri India da kaba pynjari ia kane ka korphiew miet.
Kane ka jingpynjari ia ka korphew ka treikam naduh mynta ka sngi por 6 baje jan miet haduh 5 baje mynstep bad kane kan long haduh ban da iohi ia ka jingsuk kan phai biang ha katei ka ri, la kynrad ia ki paidbah kiba hap ha kane ka korphiew ba kin ia treilang bad ka sorkar.
