Shillong Nailar 08: Ha ka sienjam ba heh ban ai jingiarap ia ki briew kiba don jingduna ha ki dkhot met, ka Composite Regional Centre for Skill Development, Rehabilitation and Empowerment of Persons with Disabilities, hapoh ka jingpyniaid jong ka Administrative Control of SVNIRTAR Cuttack, Odisha, ka tnat Empowerment of Persons with Disabilities (Divyangjan).
Ka tnat Social Justice bad Empowerment, Sorkar India, ka la pynlong ia ka jingsam ia ki tiar ai jingiarap ha U Soso Tham Auditorium, State Central Library mynta ka sngi.
Kane ka prokram ka la peit ia ki jingdonkam ha ka koit ka khiah bad ha ka liang ki tiar ai jingiarap, kaba pyni ia ka jingkut jingmut na ka bynta ka jingai bynta ia baroh bad ruh ka jingkyrshan ha ka imlang sahlang.
U Bah Paul Lyngdoh, Myntri ka tnat Social Welfare, Sorkar Meghalaya u la long u kongsan. U Pravin Bakshi, Commissioner & Secretary sha ka Sorkar Meghalaya u dei uba la shah khot kyrpang na ka bynta kane ka prokram.
Ha ka juh ka por, la don ka jingsam ia ki tiar ai jingiarap ia kiba la saindur ban pynsuk ia ka jingim jong kito kiba don jingduna ha ki dkhot met. 125 tylli ki tiar kum ki Smart Phone, Auxiliary Crutch, Teaching Learning Material (TLM Kit), Rollator, Hearing aid, CP Chair, ki jingshan, ki Wheelchair, Android Tablet ki dei kiba la sam ia kito kiba donkam ia kine ki tiar. Kane ka jingai jingkyrshan ka thmu ban pynduna ia ki jingeh ba ki longiing ki iakynduh man ka sngi.
U Bah Paul Lyngdoh, u la ban jur halor ka jingdonkam jong kane ka prokram da kaba ong, “Ka thong jong ngi mynta ka sngi ka dei ban pynthikna ba baroh ki ioh bynta ha kaba baroh ki briew, khlem da thew ia ki sap jong ki, ki lah ban ioh ia ki jingtip ba ki donkam bad ruh ki jingkyrshan.
Ki sngewkmen shisha ba ngi la ioh ban nohsynniang sha ka bha ka miat bad ka jinglaitluid jong kito ha ka imlang sahlang kiba don jingduna ha ki dkhot met.” U la iaroh ruh ia ka jingtrei shitom jong ki nongtrei ka CRC- Shillong bad u la kular ba un ai ka jingiatreilang ha ki kam ba kan dang leh nangne shakhmat.
U Dr. Ram Shakal Sahani, Director, CRC- Shillong u la pyntip ba ka ophis CRC – Shillong ka la trei na ka bynta ka bha ka miat jong kito kiba don jingduna ha ki dkhot met naduh ka 19 tarik u Naitung 2021 ha Meghalaya.
U la iaroh ia ka jingiatreilang jong ka Tnat Social Welfare, jong ka Sorkar Meghalaya ban pynlong ia ki prokram bapher bapher. U la ong ruh ba lyngba ka jingkyrshan na kine ki tiar ba la sam mynta ka sngi, kito kiba don jingduna ha ki dkhot met ki lah ban iarap ialade ban ioh ia ka pule puthi kaba bha.
Ka jingjop jong kane ka prokram ka pyni ia ka jingkut jingmut jong ka ophis CRC Shillong ban pyndap ia ki jingdonkam jong kito kiba don jingduna ha ki dkhot met lyngba ki kam kiba kyrpang bad ka jingai jingshakri da ka jingsngewlem.
Kane ka prokram sam tiar ka long kum ka nuksa na ka bynta ki kam nangne shakhmat kiba thmu ban plié lad ia baroh ban ioh bynta lang bad ruh ka jingkyrshan ha ka imlang sahlang.
