Shillong, Nailar 18: Ka KSU jong ka EJHDU ha ka 17 tarik u Nailar 2024 ka la leit ban jurip iaki border fencing ba don ha shnong Lailong bad ruh ban ai mynsiem ia saw tylli ki dorbar shnong khappud kiba kynthup iaka lejri,Lahalein,Huroi bad Hingaria.
Ka jing leit ai mynsiem bad jurip ka long halor ka nongrim ban pynrkhing iaka jingwan rung beain ki mynder na Bangladesh ha kaba kane ka ri ka don ka jingia um snam ba shyrkhei.
Ha kane ka sngi ka seng ka la ioh ban pynlong ka jingialang ha ka shnong huroi ha kaba la wan shim bynta da baroh ki saw tylli ki shnong kiba mih khmat da ki waheh shnong bad secretary shnong bad ki lai tylli ki shnat treikam ka seng naduh ka KSU Lejri Unit , KSU Huroi Unit bad ka KSU Hingaria Unit.
Ha kane ka jingialang ka seng ryngkat ki unit bad ki Dorbar shnong ki lah ioh ban ia thir bad mir jingmut ba kumno ban pynrkhing shuh shuh iaka jingwan rung ki mynder na Bangladesh sha ka ri ka jong ngi.
Ha ka jingiakren bad ki dorbar shnong bad ki unit la sngewthuh ba haduh mynta ka jinglong jingman ha ki thain khappud kiba kine ki dorbar shnong ki don ka dang biang hynrei ka shu don tang ka jingjynjar ha ka kam khaii pateng.
Ka seng ka la ioh ruh na ka jingpynsgew na ka KSU Hingaria Unit ba ha ka thain bad shnong Hingaria ki BSF kim shym la shong ha border hynrei sha pydeng surok kaba jngai kumba 3 ne 4 kilometres bad la pynpaw ruh ka jingeh ba na kine ki thain ki shait kham ioh rung bha ki khar bangla ha ki por ba la leit.
Na katei ka jaka ki la ju don rung ki riew bad kynhun kiba long dalal ban pynrung iaki khar bangla daka ia kren sngewthuh lyngba ki sbai rupa. Ka seng shen kan sa hiar khnang sha kane ka thain ban ia syllok kyrpang bad kine ki shnong khnang ban lah ban pynrkhing iaka jingrung ki mynder.
Ka seng ha kane ka sngi ka la leit ban jngoh ruh iaki BOP Huroi bad Lailong bad ruh la ioh ban ia mir jingmut bad ki heh ka BSF ba don ha kitei ki BOP shwa ban jurip sha ki jaka bala ker ksainar shiah ha khappud.
Ha ka jingiakren bad u SI jong katei ka BOP u la iathuh ruh ba haduh mynta ym pat don ka jingrung hynrei kin iai peit pyrman bha,u la iathuh ruh ba shait don hi kita ki dalal kiba leh iakine ki kam.pynrung briew na Bangla bad iakine lada lap yn leh tyngeh katkum ka ain.
Ka seng kan sa ia hiar rung sha ki katto katne tylli ki shnong khappud bad ka Bangladesh ha ki sngi ki ban wan kiba kynthup iaka Kuliang,Donaskur, Dona Umbluh Ampyrdit ha kaba kine ki long ki jaka kiba shait lailan (Vulnerable )bha ki kharbangla ban rung lynba ki Dalal.
Ka seng kan iai peit pyrman bad ruh kan iai ai ka kti kamon kti kadiang iaki dorbar shnong ki thaiñ khappud, ka seng ka buh ruh ka jingmaham ia ki paradoh parasnam jong kito ki shnong khappud ba kim bit satia ban rung shabar ka jingker ha khappud namar ba katkum ka jingiathuh ki BSF ba ki Bangladesh Border Guard (BGB) ki la ioh jingbit ban siat beit kat kiba tam ia u pud.
Na ka liang ki Border Security Force (BSF) jong ka Ri India ruh ki la ioh jingbit ban siat beit ia ki khar bangla lada ki tam shapoh u pud jong ka Ri. Te kumta la kyntu ba ki paradoh para snam jong ngi kiba don ha ki khappud ba kin husiar bad ban nym tam pud ioh don ka jingjia ba sngewsih. Kane ka long ka kyrwoh khubor na u Publicity Secretary ka KSU EJHDU Hamewanpynhun Ryngkhlem
