Shillong, Nailar 22: Ka Durand Cup Organising Committee (DCOC) mynta ka sngi ka 22 tarik u Nailar 2024 ka la pyntip paibad sha ba roh ki riewieit ïalehkai phutbol ba ia ka Semifinal jong ka Durand Cup la rah ban pynlong ha Nongbah Shillong kata ha J N Stadium, ka jingiakhun semifinal kan long ha ka 26 Tarik u Nailar 2024 ha ka por 5:30 janmit ha kaba ka Shillong Lajong FC kan ia khun bad ka Northeast United FC.
Ïa kane ka rai ban pynkylla ïa kane la shim halor ka jingïoh ïa ka resol jong ki jingïakhun quarterfinal ba la long hynnin ka sngi. Kine baroh artylli ki kynhun kin iaknieh ha ka sien ba nyngkong eh ban ioh rung sha ka phainal jong kane ka lympung ialehkai Durand Cup ka ba 133.
Ka Shillong Lajong kala rung sha ka semi phainal da ka jinglah ban pynliem ia ka Emami East Bengal da 2-1 kol ha ka jingiakhun quarter final ba long hynnin ka sngi Balang ha JN Stadium, Polo. Katba ka NEUFC kala rung sha ka semi phainal da ka jinglah ban pynliem ia ka Indian Army da 2-0 kol ha ka jingiakhun kaba la long ha SAI Staidum ha Kokrajhar, Assam.
Kat kum ka jingpynbna ka Durand Cup Organising Committee la ong Ka rai ban wanrah ia kane ka jingkylla ka dei kaba la shim halor ka result jong ka jingiakhun quarter final ba long hynin ka sngi.
Baroh artylli ki jingiakhun (quarter final) kila sakhi iaka jingialehbha na ka NEUFC bad ka Shillong Lajong, kaba ka jingjop jong u kala nang pynshongshit bad pynrhem ia I nongkyrshan ha ka thain.
Ka DCOC ka la jubab ruh ia ki jingkyrpad na ki nongkyrshan jong kine ki artylli ki kynhun bad haba ithuh ia ka jinglong kongsan jong ka madan ialehkai (Shillong) kum ka jaka ba khlain bha ki jingkyrshan jong kine ki club, ngi la rai ban pynkynriah ia ka jingiakhun semi-final hapdeng ka NEUFC pyrshah ia ka Shillong Lajong FC bad buh tarik ha ka 26 Nailar2024.
Kala ong ba kane ka sienjam ka dei kaba la shim ban pynthikna ba ki nongkyrshan, kiba dei ka mynsiem bad u dohnud jong ka lympung ialehkai, kin mad ia ki jingshongshit jong ka jingiakhun kaba itynnad bha ha ka jaka kaba kine baroh ar kynhun kila suhthied bha ha ka jingialehkai phutbol.
Ka DCOC ka la pyntip ruh ba ki ngeit ba kane ka jingpynkylla kan nang pynshongshit bad ailad ia ki kynhun ba kin ialehkai hapdeng ki paid nongkyr shan kaba ki dei ban ioh, katba ki dag iakhun ban ioh jaka ha ka phainal. Kala pyntip ba lada ka Shillong Lajong ka jop ia kane ka jingiakhun semi-final, ka jingiakhun jong ka final kan long ha Kolkata.
