Shillong, Nailar 23: Khasi Students’ Union (KSU) Wahthapbru Unit mynta ka step jongka 23tarik, Nailar 2024 ka lah pynpaw ia ka jingkynmaw burom ia ka lyngkhuh sngi iap ba 24 jongki arngut ki nongialam ba shitrhem jongka kiba kynthup ia u Samla Dawanbiang Shullai, Asst Finance Secretary KSU CEC bad u Samla Rocky Shylla, Sport Secretary KSU Wahthapbru Unit kiba lah kyllon Iap ha ka ktang Suloi ki pulit ka jylla Meghalaya.
Ban shu pynkynmaw ba kitei ki arngut ki nongialam ba shitrhem jongka KSU ki lah shah bthah jubor la ka jingim ha ki pulit ka jylla Meghalaya ha ka 23tarik, Nailar u snem 2000, ha Nongshiliang Shillong katba ki dang ia shongkai ha ka wei ka ing bad u Balajied Dkhar ba ju khot sien u Hepkhoit uba dei u dkhot jong ka HNLC.
Hynrei kum ha katei ka por kyndit kynsan ki pulit ka jylla Meghalaya kiba wan khynra ia katei ka ing ki lah shu synreit kuli naphang ia kitei ki laingut ki Samla Khasi da ka jingsuba ba kidei ki dkhot jongka kynhun lehnoh NSCN-IM.
Kumta, ha kane ka sngi na ka liang ka KSU Wahthapbru Unit ngin iai pynkynmaw ba ka dei ka sngi kaba dum tam ia ka jaitbynriew bad kum ka seng daleilei ngim lah ban shu klet noh ia ki dakmong kiba la kylla sohkhliang bad shijunom ngin pyrto nam ban pynsah jingkynmaw ia ki nongialam.
Ki dkhot ka seng ba hashuwa jongngi kiba lah phla iala ka jingim nabynta ka dawbah jong ka Ri ka jaitbynriew, “Ngi iohi ruh ba haduh katkine ki sngi na ka liang ka tnat pulit ki thrang eh hirhir ban khylliap lama noh ia ka seng KSU da ka jingpharep ba har rukom da ka jingpyrshang ban pyntieng koh tympan ha kiba bun ki liang ia dkhot da ka jing bom jing tied.
Ka jingset patok bad wat haduh ban shim syndon ia ka jingim jongki dkhot ka seng ruh kim salia shuh hynrei kynmaw ba kine kiei kiei baroh kim lah ban pynkhyllem ia ka jinglong rangbah ka seng bad ka nongrim baskhem jongki dkhot bad ka ong kumba nang phrang shuh shuh ia ka mynsiem ialeh ka bym pyndem nabynta ban ai ia ka jingshakri bahok iala ka Ri ka jaitbynriew.
‘Lyngba kane ka kyrwoh ka KSU Wahthapbru unit ka phah ruh ia ka jing sngew lem sha ki bhaing ha sem jong kine ki lai ngut ki samla” Pynkut ka kyrwoh na ka KSU Wahthapbru Unit.
