Shillong, Nailar 23: U myntri ba dei peit ia ka tnad shan iing u Marcuize Marak mynta ka sngi u la wan rah hapoh ka iing dorbar ia ka Meghalaya State Housing Board Repealing Bill, 2024, kane ka long ban pynduh noh ia ka Meghalaya State Housing Board.
Ha ka jingbatai haba wan rah ia kane ka bill ka long ba, ka Meghalaya State Housing Bod Act, 1986 (Meghalaya Act No. 6 of 1986) la shna ia kane ka ain ban thaw ia ka State Housing Board na ka bynta ban peit ia ki kam shna iing ha Meghalaya.
Kane ka ain kala treikam palat ia ka laiphew snem, wat la ka don ka jingthmu kaba bha hynrei kam shym lah ban trei kam katkum ka jngthmu na ki daw kiba bun kam shym lah ban pynrulong ia ka jingthmu ban pynbiang ia ki iing ia ki briew ha kane ka jylla.
Ka jingbym lah ban pyniaid, ka jingbym don ia ka jingkit khlieh bad ka jingiatyngkhuh ha ka rukom trei kam bad kiwei ki tnad trei kam jong ka sorkar. U myntri ranbah ba mynshuwa la khot ia ka jingialang ha ka 04/12/2014 bad la shim ia ka rai ban pynduh noh ia ka Board.
U Accountant General u la ujor ia ka jingdon jong ka Board kaba khlem treikam shuh wat la ka Public Account Committee kala bthah na duh u snem 2017 bad ka kabinet kala don ka juh ka jingmut ban pynduh noh ia ka MSHB bad ban pynduh noh ia ka ain MSHB Act 1986.
Kane a Bill kaba la wan rah mynta ka sngi ka long ban pynduh noh ia ka MSHB Act 1986 ( Meghalaya Act No.6 jong 1986) kaba la pdiang da ka Kabinet vide ID No.60 mat kaba No.75/2024 kaba ia dei bad ka tulop kaba lah ban mih na ka jingpynduh noh ia ka Board.
