Shillong, Nailar 28: Ka tnad ka koit ka khiah jong ka jylla mynta ka sngi kala kyntu ia ki paidbah ban nym syier na ka jingpang kaba la tip kum ka ‘Monkeypox’, ha ka juh ka por ki dei ban tip ba ia ka jingpynbna ynpyntip lyngba ki tnad pathai khubor kiba la ithuh da ka sorkar.
Ha Ri India kane ka jingpang la lap ha u bnai Lber 2024 ba u wei u briew ha ka jylla Kerala bala ioh ia kane ka jingpang ha dien ba la wan na kiwei ki ri jong ka pyrthei, hynrei ka jingpynbna paidbah ia kane ka jingpang kum ka PHEIC ha ka 14/Nailar/2024 ia kane ka jingpang la peitngor bha ha ki kyrdan kiba halor.
Ha duh ka 18/Nailr/2024 kane ka jingpang kala saphring ha kine kine ri jong ka pyrthei, Africa, South Africa, Kenya, Rwanda, Uganda, Democratic Republic of Congo, Burundi, Central Africa Republic, Congo Brazzaville, Cameroon, Nigeria, Ivory Cost, Liberia bad ha Middle East ha United Arab Emeriate.
Na ka liang ka tnad ka koit ka khiah kala ong ba lada don kiba la wan sha kitei ki ri hapoh kine ki 21 sngi kiba la dep bad la sdang ka jingshitom, kum ka jingkhihshoh, jingtlot kynsan, ka jingmih saw kynsan ha ka siendoh pyntip sha kine ki number 14410 lane 108 ba ki doktor kin ai ka jingsumar kaba biang por.
Ka nongpeit pyrman ia ka koit ka khiah ha ka pyrthei ka World Health Organisation (WHO) kala pynbna paidbah ba ia ka jingpang Monkeypox la pynbna kum ka jingpang ‘Public Health Emergency of International Concern’ dei halor katei ka tnad ka koit ka khiah kala pynmih ia kitei ki jingpyntip.
