Shillong, Nialar 30: U myntri ba dei peit ia ka tnad pule u Rakkam A Sangma haba juba ia ka mat ia kren bala wanrah da u bah Renikton Lyngdoh Tongkhar ban pynbun ia ki jaka pule DIET ha Nongstoin ha West Khasi Hills District.
U myntri la ong ban plie ia ka jaka pule DIET don kam ban ioh ia ka jingbit na ka NCTE ym lah ban shu plie khlem jingbit, haba phai sha ka DIET kaba don ha Nongstoin naduh bap plie ka ka jingbit kaba la ioh ka long tang 50 ngut ki khynnah.
Kane ka jingpule ia ka DIET ka long na ka bynta ban pyntbit ia ki samla pule kiba kwah ban long ki nonghikai skul ha ki kyrdan rit LP, UP ne ki skul SSA, kumba ka long mynta baroh ki jaka ai jinghikai DIET ha ka jylla ka long tang 500 ngut katba kiba apply ki long haduh 9000 ngut.
U myntri u la ong ba sngewthuh ia ka jingsngew khia jong ki dkhot ka iing dorbar bad ka sorkar ruh kum juh, halor kane ka sorkar kan sa ia k kren bad ka NCTE na ka bynta ban pan jingbit shuh ban pynbun ban pdiang ia ki khynnah kiba kwah pule DIET.
Haba ia dei bad ki jingtei kiba la sdang ha Mawkyrwat, Betasing, Khliehriat ka tnad pule kan sa pynkhreh ia ka DPR ban pyndep ia kine ki jingtrei na ka bynta ban ioh banpyndon kam ia kitei ki iing sorkar ban long ki jaka pule DIET.
Haba ia dei bad ka jingpule lyngba ka NOIS, kaba ka sorkar kala pynkut noh kane ka dei tang na ka bynta ki nonghikai kiba la don lypa ha ka kam ba kin ioh ia ka jingpyntbit kyrpang namar ha ka por ba thung ia ki kim pat ioh ka jinghikai ha kaba ia dei bad ka kam hikai.
Haba ia dei bad ka jingsiew ia ka bai bam ia ki khynnah ka sorkar ka khlem pynduh ka shu long ba ka don ka jingthud ia kaba ka sorkar kala lah ban pynbiang mynta shem yn sa siew ia ka bai bam kaba T.5000/- shibnai.
Kiwei ki dkhot ka iing dorbar kiba la ia kren ha kane ka mat kaba la wanrah da u MLA jong ka Mawkyrwat ki, long u nongalam ka liang pyrshah u Dr Mukul Sangma, bah Brightstarwell Marbaniang, Rupert Marak, u bah Methodius Dkhar bad bah Gabriel Wahlang. Baroh kiba la kren kila pynpaw ia ka jingsngew ba dei ban pynkiew ia ka jingdon ki samla pule.
