New Delhi, Nailur 05: U Bah Everlasting Pyngrope, Principal jong ka Myngken Christian Higher Secondary School, Ri Bhoi district, Meghalaya u la shah pynkup burom da ka khusnam National Teachers’ Award mynta ka sngi ha ka President jong ka ri, ka Droupadi Murmu ha ka jingialang kaba la long ha New Delhi. U la long uwei napdeng ki 50 ngut ki nonghikaiuba la ioh ia kane ka khusnam mynta u snem ha ka jingrakhe ia ka sngi Kyrpang ki Nonghikai.
U Bah Pyngrope u la ioh ia kane ka khusnam National Award for Teachers 2024 namar ki jingnoh synniang jong u sha ka pule puthi bad ka jingtei ia ka ri. U la trei na ka bynta ka School Improvement Plan, bad u la ai jingkyrshan kyrpang ia ki Khynnah kiba donkam ia ka Jinghikai Kaba Kyrpang.
Ka skul jong u ka pyndonkam ia ka ICT lyngba ki computer lab bad ki smart classrooms, kaba plié lad ia ka jingseisoh ka jingioh jinghikai bad ka jingiashim bynta ki khynnah da kaba pyndonkam ia ka teknoloji kum ka lad ban ioh jinghikai.
U la peit ia ka jingioh jinghikai ki khynnah ba donkam ka jinghikai ba kyrpang lyngba ki tiar bapher bapher bad ka jingialam lynti, ha ka jingiatreilang bad ka tnad District Social Welfare ban iarap ia ki khynnah kiba thrang ia ka jingnang jingstad.
Une u Principal u la trei borbahna ka bynta ka jingmyntoi jong ki khynnah jong kane ka thain, khamtam kito kiba duk ba suk bad kito kiba shem jingeh bad ki bym lah ban leit sha ka nongbah ban ioh ia ka jingpule kaba kham halor.
Ha ka jingai jingkren ha kane ka sngi, ka President jong ka Ri India, DroupadiMurmu ka la ong ba ki nonghikai ki hap pynkhreh ia ki briew jong ka ri kiba don ka jingnang jingstad bad kiba don ka jingsngewlem, kiba shai bad kiba kloi ban thaw ia ki lad lajong.
Ka la ong ba ka jingiaid shaphrang ha ka jingim ka dei ka jingjop, hynrei ka jingmut shisha jong ka jingim ka shong ha ka jingtrei na ka bynta ka bha ka miat jong kiwei. Baroh ngi dei ban don ka jingsngewlem.
Ki kam jong ngi ki dei ban long kiba bha. Ka jingim kaba jop ka don ha ka jingim kaba don jingmut. Ka jinghikai ia kine baroh ia ki khynnah ka dei ka kamram jong ki nonghikai.
Ka President ka la ong ba ki nonghikai ki don ka bynta kaba khraw tam ha ka jingjop jong kanokano ka rukom ai jinghikai. Ka jinglong nonghikai kam dei tang ka kam. Ka dei ka kam kaba kyntangna ka bynta ka jingkiew shaphrang jong ki briew.
Lada u khynnah um lah ban leh bha, ka dei ha kane ka por ba ki nonghikai bad ka rukom ai jinghikai ki don ka jingbahkhlieh kaba kham jur. Ka la ong ba bun sien, ki nonghikai ki kham pylleit jingmut ha kito ki khynnah kiba leh bhaja ki eksam. Hynrei ka jingtbit ha ki jingpule ka dei tang kawei ka bynta jong ka jingtbit.
U khynnah u lah ban don sap ha ka jingialehkai, lah ban don kiwei kiwei kiba tbit ha ka jinglong nongialam, kiwei pat ki sngewtynnadia ki kam kiba wanrah ia ka bha ka miat jong ka imlang sahlang. Kumta, ki nonghikai ki dei ban nang ban ithuh ia ka sap kyrpang jong ki khynnah bad kyntiew ia kane.
Ka Tnad School Education & Literacy, hapoh ka Tnad Kam Pule Puthi ka la jied 50 ngut ki nonghikai ban ioh ia ka khusnam National Teachers’ Award mynta u snem. La jiedia ki ha ka rukom kaba shai hapoh lai bynta kaba kiew na ki Distrik, sha ki Jylla bad haduh ka Ri baroh kawei da ka Tnad School Education and Literacy.
Kine ki 50 ngut ki nonghikai ba la shah jied ki dei na 28 tylli ki Jylla, 3 tylli ki UT bad 6 tylli ki Kynhun. Na kine ki 50 ngut ki nonghikai ba shah jied, 34 ki dei ki rangbah, 16 ngut ki dei ki longkmie, 2 ngut ki dei kiba don da kiwei kiwei ki sap bad 1 u dei iba trei bad ki khynnah ba donkam jinghikai ba kyrpang.
Shuh shuh, 16 ngut ki nonghikai na ka tnad Higher Education bad 16 ngut ki nonghikai na ka Tnad Skill Development and Entrepreneurship ki la shah pynkup burom.
Ka NEP 2020 ka ithuh ba ki nonghikai kiba don ka thong, ka bor bad ka jinglah treikam ki long ka jingdonkam ba kongsan na ka bynta ka jingkyntiew ia ki khynnah pule, ka kam hikai bad ki jaka pule. Ka wanrah ruh ia ki jingai jingmyntoi kum ki khusnam bad ka jingpynkup burom ban wanrah ia ka jingbha ha ka kam ai jinghikai.
Kumta, ha u snem 2023 la rai ban wanrah ar tylli ki thup jong ki jingai khusnam ha ki jaka ai jinghikai ba kham halor bad ki Polytechnic hapoh ka NAT, kaba ju ai mynshuwa tang ia ki nonghikai skul. Ki 16 ngut ki nonghikai ki dei na ki Polytechnic, ki skulbah jong ki jylla bad ki Jaka ai jingpule ba kham halor jong ka Sorkar Pdeng.
