Shillong, Nailur 09: U Bah John F Kharshiing President jong ka Meghalaya State Olympic Association (MSOA) la iathuh ba ka jingpynlong ia ka 3rd Sohra International Half Marathon 2024 kan long ha ka 21 tarik mynta u bnai.
Haba kren ha ki lat pathai khubor mynta ka sngi ha Shillong Press Club la ong ba kane ka jingjop ia ka kynhun ha kine ki ar tylli ki jingiamareh kaba kila pynlong la ar sien, kala long ka jingjop wat hapdeng ki jingeh kiba bun.
Ka jingiamareh kan long ha ki lai bynta, kaba 21 km, kaba 10 km bad kaba san kilo meter, ha kane ka jingiamareh, kiba wan ban ia mareh baroh ki long 7736 ngut, kiba wan ban ia shim bynta ha ka jingiakop ki don 2153 ngut, ki ban wan ia mareh sngewbha ki don 5583 ngut.
U bah Fainly Pariat Secretary, la ong ba baroh kito kiba la ai kyrteng kin leit ban shim ia ki T-shirt ia ki number ha ka 19 bad 20 tarik na ophis ha J N Stadium Complex Polo, lada don kiba ym lah ban wan shim ki hap ban ai ia ki jingaibor bad ryngkat ka jingpynshisha.
La bthah ia baroh ki ban ia mareh bad ki ban pdiang ia ki khusnam ki dei ban phong ia ki T-shirt, lada kim phong ia ki sopti kiba la ai da ka seng yn nym shah ban ia shimbynta, la pynbiang ia ki bolentiar bad kiba bun dei na thain Sohra.
La iathuh ba ki ri na kiwei jong ka pyrthei kiba la pynthikna ba wan ia shim bynta ki don ar ngut na Bangladesh, ar ngut na Kenya bad 3 ngut na Ethopia, katba ki dang don kiweipat kiba dang ap ia ka Visa.
U Director ka tnad ialehkai u la iathuh ba ka sorkar kala ai ka jngkyrshan kaba pura na ka bynta kane ka jingpynlang ia ka 3rd Sohra International Half Marathon bad sngew tynnad ban iohi ba ki nongiashim bynta kila dang kiew.
